Euskarazko errore sintaktikoak detektatzeko eta zuzentzeko ...

200 Saroi
siak dakarren informazio linguistikoari interesatzen zaigun hizkuntza-informazio
gehigarria gehitzen diogu. Askotarikoa izan daiteke gehitutako informazioa.
Adibidez, galderak erantzuteko sistemetarako, EuskalWordNet
(Agirre et al., 2006) balia dezakegu eta informazio semantikoa gehitu. Gure
helburuetako bat aditzarekiko komunztadura-erroreak detektatzea denez,
aditz nagusiak eta aditz laguntzaileak aberastu ditugu. Horretaz gain, sintagmen
arteko koordinazioa adierazi dugu kasu zehatz batzuetan.
Aditz laguntzaileetan komunztadurarekin zerikusi zuzena duten hizkuntza-ezaugarriak
esplizitu egin ditugu. Agerian jarritako ezaugarriak aditz
laguntzaileen paradigma edo saila (nor, nor-nori, nor-nori-nork, nor-
-nork) eta bere osagaietako bakoitzaren (nor, nori eta nork) kasua, numeroa
eta pertsona dira.
Aditz nagusiak aberasteko hiru iturri erabili ditugu:
• Eskuzko azterketa sakon baten ondorioz lortutako 100 aditz-eredu (Aldezabal,
2004).
• Corpusetatik automatikoki jasotako 2541 aditzi buruzko gauzatze-egiturak
(Aldezabal et al., 2003b).
• Euskal Hiztegian (EH) (Sarasola, 1996) sarrera duten aditz guztien
(4016 aditz) azpikategorizazio-etiketak (da, du, dio, zaio eta da-
-du. ..).
Aberasketa-prozesuari buruzko informazio sakona emango dugu VII. kapituluko
VII.4.2 atalean.
VI.2.2 Kontsulta-erregelen itzulpenerako modulua
VI.2.2.1 Kontsulta-lengoaia linguistikoak
Hizkuntzarekin zerikusia duten aplikazioetan gero eta ohikoagoa da modu
hierarkikoan etiketatutako testu- eta ahots-datuak edukitzea, eta horien gainean
kontsulta-lengoaiak baliatuz nolabaiteko kontsultak edo bilaketak egitea.
Corpusetarako zehazki garatutako kontsulta-lengoaiek datu linguistikoak
arakatzen dituzte, eta zenbait kasutan, aldatu.
Hainbat ezaugarri eskatzen zaizkie kontsulta-lengoaiei:
• Abstrakzioa. Kontsultak egiteko ez litzateke datuen errepresentazio
zehatzari buruzko ezagutzarik behar. Abstrakzio-maila handiko lengoaia
bat, erabiltzaileak duen eredu kontzeptualetik hurbilago legokeena,
egokiagoa litzateke.