KAP. 4.

III Fíggjarligar avleiðingar
av uppskotinum
At gera eina neyva kostnaðarmeting av kostnaðinum, sum stendst av
uppskotinum, er rættiliga trupult.
Orsakað av at fyrisitingarliga arbeiðið hjá løgtingsnevndum eftir uppskotinum
fellur burtur, fer kostnaðurin av starvi løgtingsins at lækka av
hesum. Tá ið uppskotið samstundis virkar fyri, at løgtingið í størri mun
framyvir verður politiskt leyst av landsstýrinum, skal væntandi størri
orka leggjast í fyrireiking av lógaruppskotum og eftirlit við landsstýrinum.
Soleiðis verða samlaðu útreiðslurnar helst at verða á sama støði.
Um farið verður til ministerialskipan, kann tað føra við sær meirkostnað
í landsumsitingini av tí, at hvør landsstýrismaður, sum tíðin
líður, kanska fer at fáa egnu telefonavgreiðslu, egnu skrivstovuútgerð,
egnu skjalagoymslu og egið skrivstovufólk, sum hann hevur burturav og
ikki saman við øðrum landsstýrismonnum. Við skilagóðari hægri fyriskipaðari
leiðslu frá løgmansins síðu skuldi tó borið til at hildið kostnaðin
fyri landsfyrisitingini á sama støði sum í dag. Ein avleiðing í fyrisitingini
vil helst eisini verða, at stovnar, sum náttúrliga hoyra saman við embætinum
hjá teimum einstøku landsstýrismonnunum, verða lagdir saman
við embæti landsstýrismanna. Soleiðis at landsstýrismaðurin í skúlamálum
fær felags umsiting við t.d. landsskúlafyrisitingini og landsstýrismaðurin
í almannamálum saman við almannastovuni.
172