KAP. 4.

verður valdur fyri alt valskeiðið, tá tingið kemur saman, og situr alt
valskeiðið. Eisini er hetta neyðugt fyri at tryggja, at tann, sum valdur
verður, hevur so breiða undirtøku sum gjørligt bæði hjá eini seinni
samgongu og eini andstøðu, og at hann ikki verður gjørdur til part í
politiskum samráðingum um landsstýrisvaldið, og m.a. verður útlutaður
sum sessur í politisku kabaluni.
Í svensku grundlógini 4. kap., § 2, er eisini ásett, at ríkisdagsformaðurin
verður valdur fyri alt valskeiðið.
Ad § 10:
Til stk. 1. Í galdandi stýrisskipan § 7 verður hugtakið tingseta brúkt.
Hetta er ávíst tíðarskeið á árinum, har løgtingið er saman og viðger
mál. Grundgevingin fyri hesum var, at løgtingsmenn komu úr øllum
Føroyum til Havnar og gistu her teir dagar, løgtingið helt fundir. Øll
løgtingsmál hava sum kunnugt nr. eftir setu og árið.
Nevndin heldur, at hugtakið løgtingsseta eigur at fáa ein nýggjan
málsligan týdning soleiðis, at gamli týdningurin verður sleptur, við tað
at flestu løgtingsmenn ferðast av bygd til hvønn løgtingsfundin, og at
løgtingsfundirnir ikki longur eru trunkaðir saman ávíst tíðarskeið.
Nevndin mælir tí til, at týdningurin av orðinum løgtingsseta verður
tíðarskeiðið frá ólavsøkudegi til ólavsøkudag árið eftir, á donskum
umsett til lagtingsår.
Danir sleptu við grundlógini § 36, stk. 1, í 1953 fólkatingssetuhugtakinum
og fóru yvir til hugtakið „folketingsår“, sum virkið fólkatingsins
fevnir um.
Til stk. 2 og stk. 3. Greinin kemur ístaðin fyri § 7, stk. 1, í galdandi
stýrisskipanarlóg. Broytingin við greinini er, at eingin kunngerð verður
send út um fundin. Fundur er altíð til ásettu tíðina á hvørjum ári.
Nevndin hevur ikki endurtikið 2. pkt. í galdandi § 7, stk. 1, um, at
løgtingið verður sett dagin eftir, um ólavsøkudagurin er sunnudagur, tá
ið tað ikki kann haldast at ganga ímóti kristna grundarlagi føroyinga at
halda henda serliga hátíðarliga tingfund sunnudag vegna tess, at gudstænasta
verður hildin fyrst, og einki politiskt tjak fer fram henda dag,
men bert løgmansrøðan um støðu landsins verður hildin.
Í greinini verður nú eisini skrúðgongan ólavsøkudag lógarfest. Henda
skrúðgonga hevur ikki bert ein hátíðarligan og mentanarligan dám. Av
tí at heimastýrið ikki hevur heiðursmerkjaskipan (riddarakrossar v.m.),
so sigur røðin í skrúðgonguni nakað um hvørja tign, teir ymsu tingmenninir
og embætismenninir hava í føroyska samfelagnum.
Hægstu tign eftir uppskotinum hevur løgtingsformaðurin. Hann er
179