KAP. 4.

fyrr enn hon er kunngjørd, og tí verður í greinini sagt, at um løgtingslóg
ikki er kunngjørd sbr. kunngerðarreglum, ásettar í løgtingslóg, so hevur
hon ikki lógargildi. Kunngerðin skal fara fram innan 30 dagar eftir
endaligu samtyktina í løgtinginum.
Ad § 28:
Greinin hevur sína fyrimynd í svensku grundlógini 6. kap. § 1.
Ad § 29:
Skipanin hevur sína fyrimynd í svensku grundlógini 6. kap. § 2.
Spyrjast kann, hví ikki bert hava verandi skipan, har løgtingið velur
løgmann? Svarið er, at løgtingið og landsstýrið eftir § 1 eru tveir óheftir
stovnar, hvørs uppgáva m.a er at hava eftirlit hvør við øðrum, og tá ber
ikki til, at annar av hesum stovnum setur hin, setanin má verða óheft á
einhvønn hátt. Hvør skal so seta løgmann, tá ið løgtingið ikki skal?
Møguleikarnir eru ógvuliga fáir. Heimastýrisskipanin sjálv førir við sær,
at hetta kann ikki verða nakar, sum er undirgivin ríkismyndugleikunum.
Eftir eru bert tvinnir møguleikar, at løgmaður verður beinleiðis fólkavaldur
ella, at brúkt verður hin svenska skipanin, har parlamentsformaðurin
skipar fyri tilnevning av forsætismálaráðharra. – Av hesum
møguleikum verður mælt til hin seinna.
Tilnevning av nýggjum løgmanni fer fram, tá ið løgmaður biður um
at verða loystur úr starvi, løgmaður fær tingsins misálit, ella løgmaður
doyr. Harafturímóti verður løgmaður ikki tilnevndur av nýggjum eftir
løgtingsval, uttan so er, at hann sjálvur vil verða loystur úr starvi, hann
fær nývalda tingsins misálit, ella at hann fekk tingsins misálit áðrenn
valið.
Eftir uppskotinum er ikki ætlanin, at løgtingsformaðurin skal samráðast
um setan av nýggjum løgmanni og vera við til at seta stevnumiðini
upp fyri nýggjari samgongu. Løgtingsformaðurin skal frá formonnunum
á tingi í ymsu politisku flokkunum hvør sær fáa frágreitt, hvussu
teir meta politisku støðuna, og hvønn teir mæla til sum løgmann. Út frá
hesum ger løgtingsformaðurin sær eina niðurstøðu um, hvør hevur
breiðastu politisku undirtøkuna og bestan møguleika ikki at fáa løgtingið
ímóti sær, og leggur fyri løgtingið uppskot um, at hesin verður tilnevndur
løgmaður.
Ætlanin við frestunum í stk. 2 og stk. 3 er, at tað ikki skal ganga ov
long tíð frá tí, at løgmaður er farin frá, til nýggjur løgmaður er settur.
Sostatt skal løgtingsformaðurin leggja fyri løgtingið uppskot til løg-
186