KAP. 4.

fær trið valda mannin. Soleiðis verður hildið fram, til øll umboðini eru
vald.
Eftir stýrisskipanarlógini § 27 er heimilað hvørjum løgtingsmanni við
tingsins loyvi at leggja fram til viðgerðar almenn mál og hesum viðvíkjandi
krevja frágreiðing frá landsstýrinum. Sbr. løgtingslógini um ábyrgd
landsstýrismanna § 6, stk. 2, verður landsstýrismaður revsaður, um
hann í hesum sambandi gevur skeivar upplýsingar ella tigur við upplýsingum,
sum eru av stórum týdningi fyri tingsins meting av málinum.
Eftir § 28 í stýrisskipanarlógini kann eingin umsókn verða løgd fyri
løgtingið, uttan tingmaður ella landsstýrið leggur hana fram. Vanligt er
tó, at løgtingsformaðurin lesur upp skriv, sum send verða løgtinginum,
og sum hann metir hava áhuga tingmanna at hava kunnleika um.
Eftir § 24 í stýrisskipanarlógini kann eingin tingmaður, meðan løgtingsseta
er, verða átalaður ella settur fastur á nakran hátt uttan so, at
hann er tikin í brotsgerð, og eftir stk. 2 kann eingin tingmaður uttan
tingsins samtykt verða kravdur til svars uttantings fyri tað, hann hevur
talað innantings. Eftir rættargangslógini § 728 a er ásetingin víðkað til
eisini at vera galdandi uttanfyri tingseturnar.
Eftir § 16, stk. 3, í stýrisskipanarlógini verður samsýning tingmanna
ásett við løgtingslóg, og er hetta gjørt við løgtingslóg nr. 11 frá
08.01.1993 um samsýning og eftirløn løgtingsmanna.
Einki á tingi endaliga samtykt løgtingslógaruppskot kann fáa lógagildi,
fyrr enn tað er staðfest av løgmanni sbr. heimastýrislógarinnar § 4,
stk. 2, og eftir stýrisskipanarlógini § 3 skal umframt løgmann eisini
landsstýrismaður undirskriva staðfestingina.
Skiftandi løgmenn hava gjøgnum tíðirnar nýtt rættin at nokta at
staðfesta við varsemi, men ein gjøgnumgongd av løgtingsmálunum tey
seinastu árini sýnir tó, at hetta er komið fyri. Í løgtingsmáli 87/1988
var endaliga samtykt ein broyting til løgtingslógina um Vaktar- og
Bjargingartænastuna, og samtykta uppskotið var 20.04.1989 sent løgmanni
til staðfestingar, men er ikki nakrantíð vorðið staðfest. Í løgtingsmáli
32/1984 var dagin fyri løgtingsval endaliga samtykt ein løgtingslóg
um byggisamtykt fyri Hvalvíkar kommunu, og hevði henda lóg bert
eina grein, sum segði: 78
„Løgtingið áleggur landsstýrinum at lata spurningin um broyting av
byggisamtyktini fyri Hvalvíkar kommunu til viðgerðar og støðutakan hjá
nýskipaða landsstýrinum aftan á løgtingsvalið.“
Lógin er ongantíð vorðin staðfest og lýst.
78 . Sí løgtingstiðindi 1984, bls. 212.
89