KAP. 4.

Heimildir
Løgtingið viðger sbr. § 19 og § 20, stk. 1, í stýrisskipanarlógini uppskot
til skattalógir (og haruppií eisini MVG og tollur v.m.) og fíggjarlógir, og
eingin útreiðsla má haldast, uttan hon er samsvarandi tí av løgtinginum
samtyktu og av løgmanni staðfestu fíggjarlógini, stýrisskipanarlógin §
21, stk. 2.
Løgtingið velur løgmann og landsstýrismenn sum umrøtt á bls. 92.
Størsta arbeiðsbyrða løgtingsins er sjálvsagt at samtykkja løgtingslógaruppskot
og tilmæli til ríkisstjórnina at seta í gildi fyri Føroyar ríkislóggávu.
Løgtingið hevur, sum áður nevnt, fyrisitingarvald.
Í nógvum løgtingslógum er løgd heimild til landsstýrið saman við
løgtingsnevnd at taka fyrisitingarliga avgerð, serliga hevur hetta vundið
uppá seg seinastu árini. Fíggjarnevnd løgtingsins hevur nógvar heimildir
í hesum sambandi. Nevnast kann sum dømi:
– Løgtingslóg nr. 28 frá 22.05.1969 um áseting av telefongjøldum
ásetur í § 1, at telefongjøld verða ásett av landsstýrinum og fíggjarnevndini
eftir uppskoti frá telefonverkinum.
– Eftir fíggjarløgtingslógini 1993 § 16/16488 verður studningur til
praktiskar fiskiroyndir latin í samráð við løgtingsins fiskivinnunevnd
(danski teksturin „lagtingets finansudvalg“!!)
– Eftir fíggjarløgtingslógini 1993 § 18/18532 verður studningur til
ídnaðarfremjandi endamál latin av landsstýrinum saman við fíggjarnevnd
løgtingsins.
– Eftir løgtingslóg nr. 102 frá 19.08.1988 um endurnýgging av fiskiskipaflotanum
§ 10 er landsstýrinum saman við fíggjarnevndini
heimilað landskassans vegna at veðhalda fyri lánum til munandi
umbygging av dekksfiskifari við tí endamáli at gera skipið meiri
nýtiligt í vinnuni.
Eisini hevur kunngerðarheimild til landsstýrið verið treytað av samtykki
frá løgtingsnevnd. Fiskivinnunevnd løgtingsins hevur nógvar slíkar
heimildir. Nevnast kunnu sum dømi:
– Sbr. § 4 í løgtingslóg nr. 8 frá 29.03.1978 um fiskiveiðu á landleiðini
er landsstýrinum saman við løgtingsins fiskivinnunevnd heimilað við
kunngerð at áseta reglur um, hvussu fiskiskapur skal fremjast á
landleiðini.
– Sbr. § 3 í løgtingslóg nr. 57 frá 05.06.1984 um hvalaveiðu við seinni
broytingum er landsstýrinum saman við fiskivinnunevnd løgtingsins
heimilað at áseta nærri reglur um hvalaveiðu og grindarakstur.
Sum onnur dømi kunnu nevnast:
90