KAP. 4.

tingi, og t.v.s. til øvugdømis, at ikki verður kravt, at hon skal verða
staðfest og kunngjørd av løgmanni, fyri at skattur skal kunna krevjast
inn.
Eingin útreiðsla má verða goldin, sum ikki er heimilað í fíggjarlóg, tó
kann peningur verða goldin í 3 mánaðir eftir fíggjarárslok fyri útreiðslur,
hildnar í farna ári eftir tágaldandi fíggjarlóg – sbr. § 21, stk. 2.
§ 22 ásetur, at løgtingið velur ein ella fleiri løntar roknskapargrannskarar.
Teir granska ársroknskapirnar og ansa, at inntøkur landsins allar
eru taldar, og at einki er goldið uttan heimild í fíggjarlóg ella aðrari
heimildarlóg. Ársroknskapirnir verða við viðmerkingum grannskaranna
lagdir løgtinginum at samtykkja. Grannskoðaraviðurskifti landskassans
verða eftir somu grein at skipa nærri við løgtingslóg. Hetta er gjørt við
løgtingslóg nr. 16 frá 26.04.1965 um grannskoðing av landsins almennu
roknskapum.
Stýrisskipanarlógin kann ikki broytast á sama hátt sum løgtingslógir
annars. Eftir § 30, stk. 1, í lógini krevst, at lógin er samtykt eftir 3
viðgerðir í eini tingsetu, nýval verður útskrivað, at nýsamankomna
løgtingið av nýggjum samtykkir lógina eftir 3 viðgerðir í fyrstu tingsetu,
og at lógin síðani verður staðfest av løgmanni. Í stk. 2 er sett inn ein
serregla frá 1985 um, at verður heimastýrislógin broytt, kunnu broytingar
í stýrisskipanarlógini, sum eru orsakaðar av broytingini, gerast
eftir vanligu mannagongdini fyri løgtingslógir. Løgtingslógin um umboðsvald
Føroya skal ikki broytast eftir § 30 mannagongdini, men sum
vanlig løgtingslóg.
Spyrjast kann: Hvussu kundi eitt løgting saman við einum løgmanni
í 1948 gera av, at stýrisskipanarlógin ikki kundi broytast, uttan at hon
var samtykt av løgtinginum bæði fyri og eftir val? Stýrisskipanarlógin er
í grundini bert ein vanlig løgtingslóg, sum átti at kunna verið broytt
eftir vanligari mannagongd, og eingin heimild er í heimastýrislógini
ella aðrari lóg at áseta serliga broytingarmannagongd. Hóast hetta er
løgfrøðiliga greitt, at henda áseting hevur fult løgfrøðiligt gildi. – Heimildin
er rættarsiðvenja. – Broytingarmannagongdin er ásett í 1948, og
einki løgting og eingin løgmaður eftir hetta hava viljað sett hesa reglu til
viks. Í 1971, 1975 og 1985 verður reglan eisini fylgd av teim løgtingum
og løgmonnum, sum tá sótu, tá ið broytingar vóru framdar í stýrisskipanarlógini
út frá eini sannføring um, at henda regla er løgfrøðiliga
bindandi.
99