Dicionario terminolóxico da vestimenta tradicional galega e ...

2.2.1. Socioterminoloxía
Dicionario terminolóxico da vestimenta tradicional galega e proposta dun sistema de
representación conceptual dinámico para a súa consulta onomasiolóxica en liña
Baseada na sociolingüística e plasmada nos traballos de Jean-Claude Boulanger e
François Gaudin nos anos oitenta, a socioterminoloxía apela á función comunicativa da
terminoloxía, encarando os termos do punto de vista do seu funcionamento e das
condicións sociolingüísticas da enunciación e estudándoos na súa dimensión interactiva
e discursiva (Conceição 1994: 34). Estuda, pois, o comportamento lingüístico dos
usuarios dunha terminoloxía dada, é dicir a súa reacción perante termos novos e a
opinión da lingua que empregan, o uso que fan deles, a difusión entre as comunidades
de usuarios que teñen etc. e aconsella a regulación polo uso frente á estandarización
imposta. A socioterminoloxía foi unha tentativa de procurar un enfoque máis realista
pero na práctica non conseguiu formular unha serie de presupostos teóricos e
metodolóxicos que lle servisen para fundamentar unha teoría propia.
2.2.2. Terminoloxía sociocognitiva
A TSC cuestiona a TXT por ignorar as interaccións entre os elementos do triángulo
semántico (mundo, mente e linguaxe) e, por tanto, a dimensión social da terminoloxía e
recorre á semántica cognitiva e á lingüística funcional como ferramentas alternativas á
abordaxe estruturalista da TXT. Por exemplo, a partir do estudo de textos científicos da
área da bioloxía, Rita Temmerman, na súa tese de doutoramento Terminology Beyond
Standardisation. Language and Categorisation in the Life Sciences (1998) e en
Towards New Ways of Terminology Description (2000), demostra que, dado que a
polisemía, a sinonimia e a linguaxe figurada interveñen no proceso de conceptualización
e desenvolvemento dos conceptos, existen algúns que poden ser descritos de acordo co
principio de univocidade da TXT e outros que non, que a TSC denomina categorías con
estrutura prototípica (é dicir, que os seres humanos temos na mente un protótipo, un
exemplar modelo de cada categoría que serve como base para levarmos á práctica a
nosa capacidade clasificatoria ou categorizadora). A TSC preconiza un novo enfoque
máis realista que renuncie a principios como a univocidade cando non é posíbel e que
leve conta doutras informacións que poden ser relevantes na descrición terminolóxica.
O máximo contributo da terminoloxía sociocognitiva é a diferente percepción dos
procesos cognitivos humanos. É dicir, mentres a terminoloxía tradicional afirma que a
mente humana pode percibir e comprender obxectivamente o mundo simplemente
grazas á súa capacidade clasificatoria, a terminoloxía sociocognitiva defende que, na
13