Journal of Italian Translation - Brooklyn College - Academic Home ...

152
Journal of Italian Translation
Se domandâti, lune…
Se domandâti, lune,
scjafoade tra i nûj
ch’a’ fénzin un prât usgnot
di pisignocs sglonfâts,
se domandâti?
Mi spegli intun grivi d’ajar
ch’al cjarine il mont,
fêr tal freit respîr de sô bieltât…
A’ tàsin ancje li’ vôs dai muarts
intal cour, ‘a tâs la vite
e il timp ch’al va e a’ nus strissine.
Tu mi cjàlis tú sole,
ràmpide muse e sidine,
se mi usmi sclissât tal pantan,
e a’ mi travane par dentri
un vint di glasse, pôre di mé,
rancóur di restâ ca…
Otave
J’ cognos masse ben il dolôr dal spietâ,
li’ òris contàdis a scontâti piardude,
smàvide lune, scarsanâl dai nûj sidinôs.
Il curtis che il cour al travane
mi mene pes vènis un sanc caglât.
No stâ prometi … No stâ zurâ …
Tal scûr de gnot inglassade
j’ cognos masse ben il dolôr dal spietâ.
Presinse
A’ si reste chi a regjistrâ events,
suts i vôj, doprant peràulis
ch’a’ no nus làssin scjamp,
vueits di sens e di spassi
intal reliquiari ch’al fo dai siumps.
E a’ no si vores ch’a si jevassi buere
a tirâ-sú i ôrs dai dîs,
a mostrâju crots intune lûs di vêri.
Li’ piíssimis móscjis a’ nus svuàlin intôr
insiliôsis ’romài pluj di vècjus sarpints.
’I lassin lâ la man sul ôr dal sfuej
fermant ancje i zesç.
Un orloj di lontan
al bat intal sanc òris di pene.