A la gueta del material espardío - Educastur Hospedaje Web

Pa vivir les nueses histories
Abriendo’l telón
L’aula pue ser l’escenariu nel que representar les obres que’l propiu alumnáu escriba.
El MONÓLOGU ye una obra de teatru na que namás fala un personaxe. L’alumnáu van
ser los autores y los actores d’un monólogu nel que van cuntar les sos emociones,
gustos, odios, quexes… Toos van falar y toos van ser escuchaos con respetu polos
compañeros, digan lo que digan.
El DIÁLOGU ye un xéneru lliterariu onde dos o más personaxes falen ente sí, dando
opiniones distintes.
Vamos dividir la clase en parexes col envís d’escribir y representar un diálogu nel
que discutan, con idees contraries, sobre un mesmu tema. Por exemplu: vacaciones
en Cuideiru/vacaciones n’El Sueve; dir a Xixón en coche/en tren; xugar a les cartes/al
dominó; dir al fútbol/al teatru…
El siguiente pasu va ser facer una obra de teatru, más llarga y con más personaxes.
Dividimos en grupos de cinco persones. Tolos grupos van tener qu’escribir una obra
con esi mesmu númberu de personaxes y con un mesmu tema principal (la busca de
la comida). L’espaciu va ser una islla desierta y el tiempu ye actual.
Pero a la hora de facer teatru en clas tamién ye importante conocer la obra de los
autores asturianos. Son munches les obres tanto vieyes como actuales que se puen
representar en clas.
Repártense los papeles ente los participantes y facemos una primer llectura coleutiva.
Dempués caún fai una llectura individual enantes de representala pa tola clas.
Nós vamos suxerir un estractu de Cantu de gaviotes de Pablo Rodríguez Medina 51 :
«MARINO: Y metióse’l paisanu na rede y entamó a rebuscar ente los pexes y cuando-y
paecía, ¡zas!, tiraba ún p’afuera, y ¡pim, pam! ¡pim, pam!, y otru, otru, y
otru más, y asina hasta la docena…
BONOME: Ladio…
LADIO: (Pesarosu por mor del sueñu) ¿Qué quies, hom?
BONOME: ¿Y si ella fore? ¿Nun lo pensasti?
LADIO: Toi yo como pa pensar, ¿cuánto llevamos perdíos?
BONOME: Va munchayá.
LADIO: Pues maxínate. De xuru que yá tienen planiao vender les mios coses. Tengo yo
una parentela fina, que tán esperando a que se faga oficial l’asuntu esti de l’afogadera
pa repartise’l pastel… Esmuélgome poles coses d’esti mundu, non poles del otru…
BONOME: ¿Y?
LADIO: Pues que colo mío, compañeru, toi yo como pa facer alcordanza de caxigalines…
Nun t’ofiendas, pero ye que los probes sois la de Dios: tamos en metada
de niundes y, ¿qué facéis?, contar unes chorraes que pa qué, y dempués, claro,
queréis que toos seyamos iguales. Si ye que nun valéis, hom, nun valéis pa ricos…¡¡Una
corona de gaviotes!! ¡¡Vaya tontadines!!».
51 Rodríguez Medina, P. (2006): Cantu de gaviotes. Uviéu, alla: 53-54.
TEMA 7 117