A la gueta del material espardío - Educastur Hospedaje Web

174
TEMA 11
Pa vivir les histories d’otra xente
El Surdimientu
Nos años 70 la sociedá asturiana sufre bien de cambeos. Ente ellos hai qu’afitar
que les capes menos favorecíes meyoraron les sos condiciones de vida y los
sos fíos llograron acceder a los estudios universitarios.
De la Universidá y de dellos coleutivos obreros van surdir los protagonistes del
cambéu políticu y social que s’empieza a dar nesos años, al rodiu la muerte de
Franco en 1975.
N’Asturies a lo cabero los años 70 entama a xestase una ideoloxía primero rexonalista
y llueu nacionalista que va tener la so voz na revista Asturias semanal.
Nesta revista va nacer en 1975 la seición «Conceyu Bable» ideada por tres
universitarios mozos: Xosé Lluis García Arias, Xuan Xosé Sánchez Vicente y
Lluis Xabel Álvarez, a los que s’axuntaron otros universitarios, estudiantes y
trabayadores col mesmu enfotu: la recuperación de la lingua y de les señes d’identidá
asturianes, autonomía p’Asturies…
Nesti tiempu la llingua va algamando consideración ente les clases dirixentes y
per primer vegada se reconoz por llei’l fechu llingüísticu asturianu. Los artículos
4 y 10 del Estatutu d’Autonomía de 1981 faen referencia al asturianu pero
ensin declaralu oficial. L’asturianu entra na escuela (1984) y siéntense les bases
pa la normativización (col nacimientu de l’Academia de la Llingua Asturiana
en 1980).
Na lliteratura van producise cambeos na llingua lliteraria y nos xéneros, yá que
vuelven a apaecer traducciones, cuentos, noveles... que nun apaecíen dende’l
sieglu XIX. Tamién s’asoleyen ensayos, trabayos d’investigación... que falaben,
davezu, de cuestiones llingüístiques y lliteraries. Los autores d’esta xeneración
rupturista son xente nacío dempués de la guerra civil que, de mano, quier romper
con tola lliteratura anterior, anque col tiempu va dir dándo-y valir.