A la gueta del material espardío - Educastur Hospedaje Web

Pa saber falar y escribir curioso
L’acentuación
L’acentu gráficu o tilde ye’l signu que val pa indicar, en dellos casos, cuála
ye la sílaba tónica d’una palabra.
Según l’acentuación, les palabres divídense en:
AGUDES: la sílaba tónica ye la última. Ponse tilde cuando la palabra acaba
en -N, -S o en vocal: atrás, cantar, caxón, virtú…
LLANES: la sílaba tónica ye la penúltima. Ponse tilde cuando la palabra
nun acaba nin en -N, nin -S nin en vocal: árbol, llápiz, uva…
ESDRÚXULES: la sílaba tónica ye l’antepenúltima. Siempre lleven tilde: cámbaru,
marítimu, páxaru…
Cuando acordies coles normes, haya qu’acentuar un diptongu o un triptongu,
la tilde allugaráse na vocal más abierta: faláu, Uviéu, viérbene…
Nos hiatos nos qu’haya una vocal zarrada (I, U), l’acentu gráficu allugaráse
na vocal zarrada: día, maíz, Raúl…
Un diptongu ye un conxuntu de dos vocales nuna mesma sílaba. Pero non
tolos conxuntos de dos vocales formen un diptongu, sinón qu’esti produzse
namái cuando una de les dos vocales (o les dos) ye zarrada (I, U).
Exemplos: culiebra, nueche, xuiciu…
Un triptongu produzse cuando un conxuntu de tres vocales atópase nuna
mesma sílaba. Exemplos: ariciáu, mieu…
Un hiatu ye un conxuntu de dos vocales que s’atopen en sílabes estremaes.
Produzse nuna secuencia de dos vocales medies o abiertes (A, E,
O) o nuna secuencia de dos vocales, una abierta y la otra zarrada y tónica.
Exemplos: maíz, paez…
Les palabres monosílabes, por norma xeneral, nun lleven tilde: mieu,
prau, soi… Pero hai delles que sí s’acentúen pa distinguise d’otres con significáu
distintu:
á (esclamativu) / a (preposición). ¡Á nenu! ¿Visti a Xuan?
ál (‘otra cosa’) / al (a + el). Mira ver si nos traes ál al salón.
dél (‘cantidá pequeña y indeterminada de’) / del (de + el). Traxeron dél
carbón del monte.
él (pronome) / el (artículu). El coche ye d’él.
TEMA 2 33