A la gueta del material espardío - Educastur Hospedaje Web

226
TEMA 14
Pa conocer meyor lo nueso
Mitoloxía
La mitoloxía ye una de les estayes más reconocíes de la cultura asturiana. Nun
esiste requexu n’Asturies que nun conoza o onde nun s’oyere enxamás una historia
rellacionada con dalgún ser mitolóxicu. Comparte delles carauterístiques
con otres zones y nun son pocos los personaxes que la formen.
Dalgunos de los más conocíos son:
Les xanes: son muyeres perguapes, viven en fontes y en ríos. Tienen como fíos
a los xaninos, que cambia polos humanos porque nun pue da-yos de
mamar.
El cuélebre: ye una culiebra enorme con ales d’esperteyu, con escames dures
y vulnerable nel gargüelu. Guarda ayalgues encantaes.
El nuberu: ye l’amu del rayu, l’orbayu, la lluvia y les tormentes. Dependiendo
de cómo lu traten na Tierra, asina se porta cola collecha.
El trasgu: pequeñu y con gorru coloráu, tien un furacu na mano izquierda y
anda faciendo trastaes per casa. Pa echalu, solo hai que pone-y retos que
nun seya a cumplir: tornar una pelleya blanca, garrar agua con una maniega…
El sumiciu: ser que se dedica a robar tolo qu’atopa y escondelo.
El busgosu: peludu y con cuernos de cabra. Ye’l señor de cueves y viesques.
Amigu de la natura, ataca a los cazadores y fai que se pierdan.
El diañu burllón: personaxe xuguetón que fai trastaes lo mesmo na corte
que na viesca, tracamundiando la so forma según quiera.
El pesadiellu: ye un demoniu malignu qu’apaez pela nueche provocando la
fatiga de les víctimes. Namás se pue echar rezando.
Los ventolinos: formen la brisa, lleven los suspiros de los amantes, adormecen
a los neños y tresporten los últimos aliendos de los moribundos.
Los espumeros: viven na mar y aseméyense a los ventolinos.
La guaxa: muyer vieya con un diente namás, dedícase a chupar el sangre de
los rapacinos.
El pataricu: pa la zona Navia-Eo fálase d’esti personaxe d’un solu güeyu que
come los náufragos que lleguen a les costes.
La güestia: son almes en pena, en comitiva con güesos encesos por veles.
Considérase un niciu de mal auguriu y si s’alcuentra, hai que metese nun círculu
que se faiga na tierra.