A la gueta del material espardío - Educastur Hospedaje Web

246
ANEXU
Amás del tabacu...
Dientro del papel del cigarru nun hai sólo tabacu. Hai otres sustancies que tienen
nomes como: alquitrán (que tamién lo pues atopar en fertilizantes o esplosivos), nicotina
(que ye un velenu mortal), butanu (qu’apaez nel gas pa los mecheros), acetona
(que tamién s’atopa en desinfectantes y pintures), dióxidu de carbonu (qu’apaez
na pintura), l’amoniacu (que s’usa pa llimpiar)...
Dellos datos
En mundu, de cada 1.000 muertes, 150 débense al tabacu. La Organización Mundial
de la Salú calcula en 3 millones les persones que muerren en mundu al añu por
culpa del tabacu.
En mundu, ente 80.000 y 100.000 persones fáense adictes al tabacu cada día.
En mundu, cada día fúmense más de 15.000 millones de cigarros.
N’España por cada 10% que xube’l preciu del tabacu, baxa un 4% el consumu.
N’España la edá media d’entamu nel consumu de tabacu ye de 13,3 años.
N’Asturies muerren 10 persones al día por culpa del tabacu.
N’Asturies de cada 10 muertos por culpa del tabacu, 9 son activos y 1 pasivu.
Por qué se fuma
Cuando se lleva un tiempu fumando, el tabacu crea dependencia física por culpa d’ún
de los sos componentes, la nicotina. Delles empreses tamién añadieron l’amoniacu col
envís de que los efeutos adictivos seyan más rápidos na persona qu’entama a fumar.
Los fumadores atribuyen al tabacu delles propiedaes: ser relaxante, placentero, ayudar
en delles situaciones...
Pa los adolescentes fumar ye un actu de rebeldía. Munches vegaes los adolescentes entamen
a fumar pa facese mayor, pa ennoviase, pa inxertase nun grupu, pa imitar a otros...
Enfermedaes que provoca’l fumar
• Cánceres: pulmón, tráquea, bronquios, farinxe, esófagu, riñón...
• Enfermedaes cardiovasculares: hipertensión, aneurisma de l’aorta...
• Enfermedaes respiratories: neumonía, gripe, bronquitis...