A la gueta del material espardío - Educastur Hospedaje Web

Testu
34 poemes (a imaxe del silenciu) d’Aurelio G. Ovies,
una llectura pal branu
Pablo Texón
El branu podía ser un columbiu amarráu al peréu, les andarines fieles viendo cómo
madura la vida, una caxa de galletes ayenes, muncha fruta, munchos suaños, ropa
nuevo, una escuelina trancada y bien trancada, un cabás con cereces que nunca tienen
priesa. El branu podía ser somorguiase nes páxines qu’Aurelio Ovies trabaya
con manes d’artesanu humilde, d’escultor sinceru que saca de la tierra más probetayo
la figura más noble. Sí, el centru del universu tamién ta en Bañugues.
Aurelio abre la riega de la so producción n’asturianu con 34 disparos derechos a
les coraes y a la memoria. 34 alegatos contra l’olvidu. Nun renuncia a les constantes
de la so obra, pero esta vez los versos saben más a mar, güelen más a herba, a
salmoria, a gárabos amburando. Y a branu. Esi tiempu de lluz (los rayos del branu
entrando / hasta la siesta) y flor (Taben toles hortensies / florecíes pa ella, la cirolar
/ cargada, los sanxuaninos / llenos d’abeyes y de branu, / los nuesos corazones
barbando nel so pechu).
La midida de l’ausencia, tamién: ‘Tercer branu ensin ti’: sobre les coses. Tercer branu,
equí, / nel to güertín, sentáu, a media / tarde. Ovies quier ser —y nosotros con
elli— un pastor d’Orihuela, un afilador en bicicleta, un pintor del tiempu. Quier volver
a tener el pechu d’un nenu pa sorber tol aire que trai’l Cantábricu, pa esguilar
per tolos árboles, pa ser a atropar tesoros tan llueu. Y sabe que’l milagru de la vuelta
namás se pue dar en branu (Esta mañana —xunu, sol, silenciu— / amargamente
guapa, yá la viví / fai tiempu. Nun sé ónde / nin cuando), cuando rozamos el camín y
facemos un nial d’esperances (Cuanto espero del mundu, téngolo yá nes manos. / De
la fe, les veletes de xelu sol cielu azul de xunu).
En ‘34 poemes (a imaxe del silenciu)’ siéntese’l pulsu del poeta maduru que topó la
sienda acionada pa la so voz: la contención metafórica, l’alliteración esnidiosa, la
precisión del encabalgamientu. Y ello con un asturianu afechiscao y creíble, que sal
—mui de dientro— afuera, vida arriba. Paezme qu’Aurelio nunca va cansar de repetímoslo:
el branu ye una estación con madre al fondu 8 .
Exercicios
1. ¿En qué seición del periódicu podemos inxertar esti testu? ¿Por qué?
2. Busca n’internet información sobre Aurelio G. Ovies y escribi una noticia cultural
basándote no atopao.
8 Tomáu de la seición «Alitar Asturies» del diariu El Comercio (11 d’agostu de 2004).
TEMA 2 37