A la gueta del material espardío - Educastur Hospedaje Web

38
TEMA 2
Pa vivir les histories d’otra xente
La lliteratura na Edá Media
A finales del sieglu XII y entamos del XIII empicipia a sustituise’l llatín pol
romance como llingua d’escritura. Nesti tiempu tenemos que distinguir
ente lliteratura xurídica y lliteratura non xurídica 9 .
Van ser los testos xurídicos del reinu asturianu los que nos van dar la meyor
información de la llingua usada nesa dómina. Son los fueros, ordenances
municipales y documentos notariales.
Los fueros son, en palabres de García Arias, «testimoniu cimeru del ordenamientu
xurídicu del reinu ástur». Consérvense’l Fueru Xulgu, el Fueru
d’Uviéu y el Fueru d’Avilés.
Les ordenances municipales son reglamentaciones de conceyu. Les más
importantes son les Ordenances del Conceyu d’Uviéu.
Los documentos notariales son, davezu, testos curtios escritos por notarios
en testamentos, compraventas, donaciones…
No que cinca a la lliteratura non xurídica hai que conseñar qu’hai testimonios
del emplegu del asturianu nella, anque les copies que se caltuvieron
son tardíes y mui castellanizaes, como’l Llibru d’Alexandre o la Disputa
d’Elena y María.
Hai que conseñar la esistencia de xuglares na corte asturiana. Nel añu
1199 documéntase’l primer trovador asturianu. Estos xuglares sedríen
autores o tresmisores d’obres d’estremaos xéneros poéticos.
El dominiu castellanu del reinu d’Asturies a partir del añu 1230, el puxu
del castellanu (gracies a reis como Fernando III y Alfonso X) y el trunfu de
los Trastámara na segunda metá del sieglu XIV (que traxeron a Asturies
«dignatarios civiles y eclesiásticos»), llevaron a la castellanización documental
y al aumentu de lliteratura en castellanu.
A partir d’esti momentu, l’asturianu escritu dexó de dir en paralelu al castellanu
faláu.
9 Más sobre la lliteratura medieval en García Arias, X. Ll. (2002): «La lliteratura medieval» n’Historia de la
lliteratura asturiana. Uviéu, alla: 19-29.