A la gueta del material espardío - Educastur Hospedaje Web

22
TEMA 1
Pa vivir les histories d’otra xente
La lliteratura de tresmisión oral
N’Asturies caltiénse entá bien de lliteratura de tresmisión oral.
El so caltenimientu de xuru que tuvo que ver cola so estructura xeógráfica,
organización social y l’aisllamientu y falta de bones comunicaciones a
lo llargo de munchu tiempu.
La tresmisión d’esti tipu de lliteratura va xunida a delles xeres o trabayos
que se facíen n’andecha, como les esfoyaces, o a dellos aconceyamientos o
festexos, como los filandones, les fiestes o les romeríes; ensin escaecer que
dacuando taba tamién venceyada a delles profesiones, como la de los xastres,
que diben de pueblu en pueblu faciendo’l so llabor. Los ciegos o les
persones que de xemes en cuando aportaben a los pueblos yeren asina
mesmo axentes d’esa tresmisión. La organización familiar, de convivencia
nuna mesma casa de varies xeneraciones, facía vidable que los más vieyos,
la güela por exemplu, que yeren los que taben davezu en casa mientres
los otros diben a trabayar, contaren cuentos o cantaren romances y
otros cantares a los neños y asina la cadena se siguiere allargando 2 .
Anguaño podemos atopar n’Asturies: cuentos, cosadielles, dichos, creencies,
cantares, romances, lleendes, aguilandos, traballingües...
Éstos tán perdiéndose porque la tresmisión ta frañendo. Muncha xente
vieyo yá nun saben estes histories y quien les saben nun les cunta, y asina
ta desaniciando una cadena qu’entamare hai milenta años.
2 Cano González, A. y M. Fernández Insuela, A. (2002): «La lliteratura popular de trasmisión oral» n’Historia
de la lliteratura asturiana. Uviéu, ALLA: 31-60.