A la gueta del material espardío - Educastur Hospedaje Web

118
TEMA 7
Pa conocer meyor lo nueso
Normalización y Normativización
Pue definise la normalización llingüística como’l conxuntu de polítiques dirixíes
a recuperar l’usu d’una llingua. Son unes midíes que surden col envís de llograr
qu’una llingua recupere les sos funciones sociales, esto ye, que tenga un
usu normal na sociedá.
Les primeres propuestes de normalización va dales el grupu ‘Conceyu Bable’,
nos años setenta del sieglu xx. Nacíu a partir d’una seición na revista Asturias
Semanal, foron munches les propuestes qu’entamaron a desendolcase
dende entós.
La normalización social plena, la presencia del asturianu en tolos ámbitos de la
sociedá: enseñanza, medios de comunicación, toponimia, vida pública, alministración…
asina como’l cambéu nel estatus llegal de la llingua son dalgunes de
les reivindicaciones que, dende la época de Conceyu Bable, siguen tando presentes
anguaño.
Nun ye posible pensar nun procesu de normalización sin tener en cuenta otru
procesu: la normativización, el dotar de normativa a la llingua.
Toles llingües tienen variedaes o dialeutos, esto ye, maneres distintes de ser falaes
dependiendo de les zones del so territoriu. Amás, tamién cambien según se
tea cola familia, amistaes, xente vecino… o en situaciones más formales.
Pa que toles posibles variedaes d’una llingua puean tener un puntu de referencia
común, existe una norma culta, un modelu estándar nel que fixase pa usar
la llingua d’un mou correutu.
Asina, un andaluz fala na so variedá de llingua castellana, pero a la hora d’escribir
utiliza la norma culta del castellanu (fecha con aportaciones de tolos dialeutos
pero con un pesu grande del dialeutu de la Meseta Norte).
Nel casu del asturianu, les primeres propuestes pa unes normes ortográfiques
dioles Junquera Huergo na segunda metá del sieglu XIX. Pero les primeres con
una intención unificadora dioles el grupu Conceyu Bable en 1978. La norma fízose
con aportaciones de toles variedaes anque con un pesu mayor, por criterios
demográficos, de la variedá central. El criteriu que se siguió foi non alloñase
muncho de les llingües romániques del entornu (usando lletres como c, qu, gu,
b, v, h…). Tamién se reguló l’emplegu d’apóstrofos, contraiciones y guiones.
L’Academia de la Llingua Asturiana, máximu muérganu na materia, asoleyó en
1981 les primeres Normes ortográfiques. En 1998 apaez la Gramática que, xunto
col Diccionariu del añu 2000, formen el corpus normativu de la nuesa llingua.