A la gueta del material espardío - Educastur Hospedaje Web

Pa vivir les histories d’otra xente
La Ilustración
Nesti tiempu la imprenta nun llegare tovía a Asturies y eso fizo que munches
obres circularen manuscrites y se perdieren.
Ye un tiempu onde dellos intelectuales asturianos van intentar sacar a Asturies
del atrasu económicu y cultural nel que s’asitiaba y van dar les bases del futuru
desarrollu d’Asturies.
Nesta dómina rescamplen con lluz propia autores como Bruno Fernández Cepeda,
Xosefa Xovellanos y Antón Balvidares Argüelles.
Bruno Fernández Cepeda naz en Villaviciosa nel añu 1744 y
muerre en 1803. Nun conocemos más que tres poemes: Felicitación
d’unos díes, La enfermedá, Bayura d’Asturies (el más
conocíu, onde un cortesanu y una dama falen de la historia de
la nuesa tierra).
Xosefa Xovellanos (1745-1807), hermana de Gaspar, tuvo una
vida desgraciada: pierde a los fíos de rapacinos, quedando viuda
a los 28 años. Estes circunstancies personales influyeron na
so vida posterior, esmoleciéndose polos demás y dedicándose a
obres de caridá.
Na so obra reflexa carauterístiques propies de la Ilustración:
muestra desigualdaes sociales, fai crítica social… Ente les sos
obres, que conocemos gracies a Caveda, mentamos: Descripción
de les funciones con que la villa de Xixón celebró’l nombramientu
del Escmu. Sr. D. Gaspar de Xovellanos pal ministeriu de Gracia y Xusticia,
Descripción de les funciones con que la ciudá d’Uviéu celebró la coronación
de Carlos IV, Preparativos para la proclamación de Carlos IV en Oviedo.
Antón Balvidares Argüelles (1751-1792) vivió la mayor parte de la so vida nel
conceyu de Nava. Namás lleguen a nosotros les poesíes que nos tresmite Caveda
na so antoloxía, anque persábese qu’escribió delles más.
Testos
1 Preparativos pa la proclamación de Carlos IV n’Uviéu
Malamán que vos fuestes miós hermanos
cuando el Rey ños unvió tanta folgancia,
que todos anden llocos á dos manos.
El q’era home de pesu no ha sostancia;
hoy el q’ayer fó serio, salta y brinca,
y todu el mundu, fechu ‘stá una Francia.
Y, la probe de mín, non fago trinca,
ñin me puedo allegrara, ñin ye posible
q’afaye suelu, ñin en que fer finca.
Pos anque’l Rey ye bonu y pacetible,
y esperen meyoranza aqueso é cuentu:
cuantu ven los miós güeyos ye ‘spantible.
TEMA 4 69