A la gueta del material espardío - Educastur Hospedaje Web

150
TEMA 9
Pa conocer meyor lo nueso
Música tradicional
La música tradicional asturiana vien asociada munches vegaes a los llabores
que se daben na vida productiva. Si bien munches veces eses xeres acompañábense
de música al empar que se desendolcaben, n’otres ocasiones, bien valieron
p’arriquecer los temes de los cantares populares.
Les feries y los mercaos yeren un bon sitiu pa l’apaición de tou tipu de músicos,
que tenten de ganase la vida. Una figura perconocida n’Asturies nesti sen
ye la del ciegu músicu que diba acompañáu d’un neñu o de la muyer, que-y valía
de guía. Cola ayuda d’unos pliegos con viñetes onde se contaba la historia
de les coples y que’l guía señalaba con un punteru, diba pregonándoles al altu
la lleva. Al final, repartíen les coples ente’l públicu, que-yos daba perres. Solíen
acompañase d’instrumentos.
Eduardo Martínez Torner (1888-1955) dedicóse cuasi dafechu a atropar melodíes
y temes populares asturianos que dempués diba reflexar nel Cancioneru
Musical de la Llírica Popular Asturiana, conocíu más pol nome de Cancioneru
de Torner. Axuntó más de 500 melodíes asturianes, estudiándoles y clasificándoles
acordies cola melodía: dances, añaes, canciones de baille, de trabayu…
Los instrumentos na música d’Asturies más representativos son la gaita y el
tambor, pero nun son los únicos. Al ser perconocíos, quiciabes mereza más la
pena parase nos que se construyen en casa como la xiblata de cañavera o la
payel.l.a, por exemplu, que cambia’l so usu na cocina pola so presencia nos
bailles.