A la gueta del material espardío - Educastur Hospedaje Web

Xustificación del trabayu
ENTAMU
L’asignatura de Llingua Asturiana lleva viviendo dende los primeros tiempos de
la so enseñanza una situación enforma precaria en cuantes a les posibilidaes de
material afayadizo pa les clases que se puen atopar nel mercáu.
Nel casu de la Educación Secundaria, el trabayu de los y les profesores foi y sigue
siendo fundamental nel desendolcu de l’asignatura, yá que l’apaición de los llibros
de testu ye bastante de recién. La propia situación del alumnáu y del profesoráu
fai que, a pesar del sofitu que puen suponen los materiales espublizaos, seya
necesario disponer de recursos y propuestes que completen lo que yá existe, asina
como apurrir idees que faigan les xeres diaries de los enseñantes más llevaderes.
Distribución de los temes
La nuesa idea ye dividir los temes en cuatro estayes caún, siguiendo les siguientes
pautes:
– Pa saber falar y escribir curioso: la estaya gramatical
Nun quier ser más qu’un esquema cenciellu, colos puntos más importantes de
caún de los temes trataos, poniendo tamién atención en cuestiones puntuales,
nes que los errores son frecuentes o nes que merez la pena mayor enfotu. Va
tratase d’un resume afayadizu pa tener de base, non d’una esplicación fonda,
que pa eso sobren les fuentes y los conocimientos de los enseñantes.
– Pa falar y escribir: la estaya práutica
Per aciu de delles propuestes mui estremaes ente sí, van ponese en práutica
la llingua escrita y la llingua oral. Anque dalgunes tean más empobinaes
p’hacia la escritura o la oralidá respeutivamente, el plantegamientu presentáu
pue cambiase dafechu ya iguar una actividá nueva. Too depende del oxetivu
que se quiera trabayar. Equí propónense idees que caún pue desendolcar
na clase como considere meyor en cada momentu.
– Pa vivir les histories d’otra xente: la estaya lliteraria (I)
Nun se pue escaecer la rellación llingua-lliteratura dientro d’esti trabayu.
Poro, repártense equí les principales dómines y movimientos que fueron carauterizando
la lliteratura asturiana dende cuantayá. Como resulta imposible
abarcalo too y trabayar tolos autores que signifiquen daqué na nuesa llingua,
la idea ye un breve plantegamientu teóricu y una esbilla de testos y escritores
qu’amuesen les carauterístiques de cada etapa.
ENTAMU 9