Byggingareftirlitið - Skipulagsstofnun

1.03 Uppbygging skýrslu
Skýrslan er þannig upp byggð að heildarniðurstöður hennar eru birtar hér í upphafi
eða þegar að loknum þessum inngangi. Þá tekur við kafli sem nefndur er „Yfirlit“
og ætlað er að gefa yfirlit yfir helstu efnisþætti skýrslunnar. Að því loknu taka við
kaflar þar sem gerð er grein fyrir spurningum og svörum vegna könnunarinnar.
Reynt var að hafa kaflaskiptingu þannig að kaflar skýrslunnar fylgi samsvarandi
efnisröðun í byggingarreglugerð.
Til nánari skýringar, þá er þetta gert á þann veg að t.d. er 4. kafli skýrslunnar látinn
fjalla eingöngu um efni sem tengist 6. grein til og með 11. grein byggingarreglugerðar.
Kaflinn þar á eftir fjallar um byggingarleyfi. Umfjöllun um
byggingarleyfi tengist 12.-14. grein byggingarreglugerðar. Síðan eiga aðrir kaflar
svipaða samsvörun s.s. hönnunargögn, byggingarstjóri og iðnmeistari og úttektir
o.s.frv. Síðustu þrír kaflarnir; Stjórnsýsluaðgerðir, Vottanir og Byggingargallar
víkja reyndar frá þessari meginreglu þar sem þeir hver um sig fjalla um afmarkaðra
efni. Í upphafi hvers kafla er samantekt og síðan niðurstaða í lok hvers kafla.
Eðli spurninga getur verið mismunandi. Þær tengjast oft beint ákveðnum greinum
byggingarreglugerðar og geta t.d. varðað það hvort tiltekið ákvæði sé uppfyllt.
Dæmi um það er þessi beina spurning: „Er byggingarleyfi alltaf skriflegt?“.
Spurningar geta líka verið tengdar einstaka athöfnum sem þarf að framkvæma eigi
ákvæði reglugerðar að vera uppfyllt. Þar má nefna dæmi um spurningar í greinum
6.03 og 6.04 sem báðar tengjast yfirferð hönnunargagna. Í fyrri spurningunni er
leitað eftir því með hvaða hugarfari byggingarfulltrúinn fer yfir hönnunargögn.
Með síðari spurningunni er síðan leitað eftir því hvort hann framkvæmir þessa
athöfn alltaf á þennan ákveðna hátt.
Einnig er um að ræða beinar spurningar til byggingarfulltrúa. Þar er álits leitað.
Það getur varðað samskipti, starfsaðstöðu, hvort breytinga sé þörf o.s.frv. Þessum
spurningum fylgir yfirleitt ekki umfjöllun af hálfu skýrsluhöfundar. Þar er oftast
aðeins gerð grein fyrir svörum við spurningunni. Í þessu sambandi verður að koma
fram að skýrsluhöfundur skráði svör eftir munnlegri framsögn. Eðlilega er þar því
alltaf um að ræða megininntak, eins og spyrill skildi byggingarfulltrúann. Einnig
var stundum unnið frekar úr þessum svörum þannig að samhljóða svör eru í
einhverjum tilvikum sameinuð í eitt. Auk þess kemur fyrir að svör eru stytt.
Ábyrgð á því að þar sé rétt farið með mál er eðlilega skýrsluhöfundar.
6