Byggingareftirlitið - Skipulagsstofnun

Formáli
Samkvæmt skipulags- og byggingarlögum nr. 73/1997 fer umhverfisráðherra með
yfirstjórn byggingarmála en ráðherra til aðstoðar er Skipulagsstofnun. Frá árinu
2002 hefur við gerð frumvarpa til skipulagslaga annars vegar og mannvirkjalaga
hins vegar verið reiknað með því að byggingarmál verði færð frá Skipulagsstofnun
til nýrrar Byggingarstofnunar sem að stofni til væri nú starfandi Brunamálastofnun.
Vegna verulegrar aukningar afgreiðslu skipulagsmála hjá Skipulagsstofnun frá
gildistöku skipulags- og byggingarlaganna 1. janúar 1998 og vegna þess að
byggingarmálin voru á leið frá stofnuninni dró stofnunin, frá árinu 2004, verulega
úr áherslum á byggingarmál. Þar sem dráttur varð á að frumvörpin yrðu að lögum
skapaðist ákveðið óvissuástand þar sem byggingarfulltrúar, hönnuðir og aðrir þeir
sem koma að byggingarmálum áttu erfitt með að átta sig á því hvert þeir gætu
snúið sér varðandi ráðleggingar. Verkaskipting milli umhverfisráðuneytis,
Skipulagsstofnunar, Brunamálastofnunar og annarra stofnana var í framkvæmd
orðin nokkuð óljós.
Skipulagsstofnun tók málið upp á samráðsfundi stofnunarinnar og
umhverfisráðuneytisins í október 2006. Vorið 2007 náðist samstaða um það á milli
umhverfisráðuneytisins, Skipulagsstofnunar og Brunamálastofnunar að gert yrði
átak í byggingarmálunum. Ákveðið var gera könnun á stöðu byggingareftirlits í
landinu í samráði við félag byggingarfulltrúa og vinna í framhaldi af því að gerð
leiðbeininga til að stuðla að samræmingu vinnubragða byggingarfulltrúa við
afgreiðslu og eftirlit.
Ákveðið var að auglýsa eftir starfsmanni sem myndi sinna þessu verkefni. Þar sem
Skipulagsstofnun hafði ekki fjármagn í verkefnið var ákveðið að Brunamálastofnun
myndi greiða nýjum starfsmanni laun og gert ráð fyrir að hann hefði vinnuaðstöðu
á Skipulagsstofnun þar til hann flyttist yfir til Byggingarstofnunar með nýjum
mannvirkjalögum.
Benedikt Jónsson, verkfræðingur var ráðinn til starfans og hefur honum tekist í
samráði við félag byggingarfulltrúa að safna mikilvægum upplýsingum um
framkvæmd byggingareftirlitsins og störf og starfsaðstöðu byggingarfulltrúa.
Niðurstöður Benedikts eru birtar í þessari skýrslu ásamt hugmyndum um hvernig
bregðast megi við og bæta úr því betur mætti fara.
Stefán Thors, skipulagsstjóri ríkisins