Byggingareftirlitið - Skipulagsstofnun

7.11 Niðurstöður
Í kaflanum sem hér er fjallað um kemur fram að hluti byggingarstjóra gerir sér ekki
grein fyrir ábyrgð sinni og hlutverki. Jafnvel hjá þeim byggingarfulltrúum sem
könnuðust ekki við nein vandamál í samskiptum við byggingarstjóra kom samt
fram að „kannski vantar meiri fræðslu um ábyrgð þeirra og störf“. Eðlilegt er því
að líta svo á að þörf sé á að fræða byggingarstjóra frekar um þá ábyrgð sem þeir
bera og um þau störf sem þeim ber að sinna.
Brot byggingarstjóra eru fjölbreytt og virðast nokkuð tíð hjá hluta stéttarinnar.
Ætla má að með aukinni fræðslu megi bæta ástandið en einnig þurfa úrræði við
brotum að vera skýr og þeim beitt á samræmdan hátt.
Spurðir um úrræði telur nokkur meirihluti byggingarfulltrúa að fullnægjandi úrræði
vegna brota séu fyrir hendi. Aðrir eru því ekki sammála og telja frekari úrræði
vanta. Þá skýrari, fljótvirkari og einfaldari úrræði. Hvorugur hópurinn virðist beita
úrræðum að neinu ráði þó svo að báðir hópar viðurkenni að reglur séu brotnar. Því
virðist sem nokkuð ráðaleysi sé ríkjandi í þessum málum.
Greinilega er þörf á frekari umræðu eða stefnumótun um meðhöndlun brota gegn
ákvæðum byggingarreglugerðarinnar, sérstaklega hvernig á þessum brotum skuli
tekið. Þar virðist hugmynd um punktakerfi svipað og vegna umferðarlagabrota
eiga talsverðan hljómgrunn meðal stéttarinnar, enda er oft um að ræða smærri brot
sem gjarnan eru ítrekuð. Þar gæti eiginleiki punktakerfisins til uppsöfnunar hentað.
Þrátt fyrir að mikill hluti umfjöllunar hér sé um úrræði og brot skiptir eðlilega
meginmáli að byggingarfulltrúar bregðist allir á sama hátt við öllum málum sem
upp koma. Misvísandi túlkun embætta er til þess fallin að rugla markaðinn. Því er
tekið undir álit byggingarfulltrúa sem fram kom hér að framan.
Svo vitnað sé í ummælin: „Verklagsreglur þarf til að samræma aðgerðir, þannig
að allir byggingarfulltrúar afgreiði mál eins“.
89