Byggingareftirlitið - Skipulagsstofnun

7.0 Byggingarstjórar og iðnmeistarar
7.01 Samantekt
Kafli þessi um byggingarstjóra og iðnmeistara tengist ákvæðum byggingarreglugerðar,
að mestu grein 31 til og með 47. grein.
Ekki kemur fram annað í þessum kafla en að alltaf sé gert ráð fyrir að
byggingarstjórar séu skráðir á verk. Fyrir hendi eru ákveðnar meginstefnur
varðandi það hvaða meistara byggingarfulltrúar gera kröfur um að séu skráðir á
einstök verk. Ekki er hægt að tala þar um fullt samræmi milli embætta en nokkuð
sterka samsvörun. Skiptar skoðanir eru á meðal byggingarfulltrúa um það hvort
þeir vilji breyta því kerfi byggingarstjóra og iðnmeistara sem nú er við lýði. Hluti
þeirra vill engar breytingar, aðrir vilja ýmist sjá meiri eða minni afskipti
byggingarfulltrúa af starfsemi iðnmeistara.
Ákvæði byggingarreglugerðar um staðfestingu verkloka, sbr. byggingarreglugerð
gr. 35.2, er almennt ekki virt nema því aðeins að lokaúttekt verks fari fram. Lítill
hluti byggingarfulltrúa kveðst alltaf ganga eftir því að þetta ákvæði sé virt.
Byggingarfulltrúar eru ekki sammála um hvort auka þurfi úrræði byggingarreglugerðar
vegna brota byggingarstjóra. Þeir eru þó sammála um að úrræðum
byggingarreglugerðar sé yfirleitt ekki beitt, þrátt fyrir að oft sé ástæða til.
Talsverðum hluta þeirra finnst jákvætt ef hægt væri að koma á einfaldari úrræðum
vegna brota, t.d. byggðu upp á punktakerfi svipuðu og gagnvart umferðarlagabrotum.
Margir telja að frekari formlegheit eða festa sé æskileg í ýmsum samskiptum
byggingarfulltrúa við byggingarstjóra og iðnmeistara. Samræmdar verklagsreglur
og/eða leiðbeiningar um slík samskipti væru til bóta. Nokkur hluti vill sjá heimild
til að hafa afgreiðslur vegna smáverka einfaldari. Þá ýmist þannig að
byggingarstjóri einn sé þar skráður á verk hjá byggingarfulltrúa eða að meistara sé
heimilt að sjá um verk án byggingarstjórans.
Meirihluti byggingarfulltrúa kannast við að upp komi vandamál vegna
byggingarstjóra. Nokkuð er um að byggingarstjórar láti hjá líða að kalla
byggingarfulltrúa til úttektar. Eitthvað er einnig um að þeir sem þó kalla
byggingarfulltrúa til úttekta séu síðan ekki viðstaddir úttektina sjálfir.
Kvartað er yfir því að hluti byggingarstjóra sinni eftirliti ekki nægjanlega, vikið sé
frá uppdráttum, byggingarstjórinn standi sig ekki nægjanlega vel við að tryggja að
réttir uppdrættir séu á byggingarstað og talað er um „byggingarstjóra í fjarvinnslu“
þ.e. þá sem taka að sér byggingarstjórn en eru staðsettir í öðrum landshluta og
koma aldrei á byggingarstað. Þá er talið alvarlegt vandamál hversu algengt sé að
byggingarstjórar afli ekki upplýsinga um eiginleika eða vottun þeirrar vöru sem
þeir nota til mannvirkjagerðar.
77