Byggingareftirlitið - Skipulagsstofnun

4.15 Niðurstöður
Eins og fram kemur fjallar kafli þessi að mestu um starfsaðstöðu, skráningar og
varðveislu gagna. Embættin sem fjallað er um eru mjög misstór bæði hvað varðar
umsvif og landfræðilega víðáttu. Starfsmenn eru allt frá því að vera einn í
hlutastarfi í það að vera á þriðja tug í fullu starfi þar sem flest er. Eðlilega verður
því að gera ráð fyrir að eitthvað sé staðið mismunandi að verki hjá embættunum,
enda fæst ekki annað séð við lestur þessa kafla en að einhver munur sé á
afgreiðslum þeirra og starfsemi hvað varðar þá þætti sem hér er fjallað um.
Það er eðlileg krafa þeirra sem viðskipti eiga við þessi embætti að þeir fái
sambærilega afgreiðslu og sömu túlkun laga og reglugerðar hjá öllum embættum,
óháð staðsetningu og stærð embættanna. Aukin samræming á starfsemi
embættanna er því mikilvæg.
Fram kemur hjá hluta byggingarfulltrúa að þeir telja þörf aukinnar samræmingar á
störfum, enda eru almennt vel samræmd vinnubrögð og samræmd túlkun ákvæða
Skipulags- og byggingarlaga og byggingarreglugerðar mikilvæg leið til þess að
bæta og jafna aðstöðu allra embætta.
Eftirfarandi þættir, sem komu fram í viðtölum við byggingarfulltrúa vegna þessarar
könnunar, eru allir taldir til þess fallnir að samræma vinnubrögð og styrkja
starfsaðstöðu embætta:
Aukinn bakstuðning þarf frá stjórnvöldum t.d. þannig að fyrir hendi séu ákveðnir
tengiliðir í stjórnsýslustofnunum. Þá bæði hjá stjórnsýslu byggingarmála og öðrum
stofnunum sem byggingarfulltrúar þurfa að hafa samskipti við s.s. Vinnueftirliti,
Umhverfisstofnun o.fl.
Mikilvægt er að skýrar leiðbeiningar og verklagsreglur séu fyrir hendi. Þær geti
hugsanlega verið í formi handbókar þar sem fram koma almennar leiðbeiningar og
túlkun á reglum. Heppilegt væri að hafa gátlista, einnig væri æskilegt að fyrir
hendi væri uppsetning allra helstu eyðublaða.
Talið er æskilegt að haldið sé námskeið um lögfræðilega þætti, t.d. stjórnsýslumál.
Hluti byggingarfulltrúa vill aukna samvinnu um skráningu og varðveislu gagna, t.d.
með samræmdum gagnagrunni. Rétt er að taka fram að skiptar skoðanir eru um
þetta atriði þar sem mörg embætti eru nú þegar með öflug skráningarkerfi. Hins
vegar væri óneitanlega heppilegt, sérstaklega fyrir minni embætti, að aðgangur
væri fyrir hendi að slíku samræmdu kerfi.
Mikilvægt er einnig að fyrir hendi séu einfaldari úrræði vegna brota eða vanefnda,
sérstaklega vegna hönnuða og byggingarstjóra, þar sem þeim úrræðum sem fyrir
hendi eru í dag er lítið beitt, enda telja margir byggingarfulltrúar að þau henti ekki
vegna algengustu brota þessara aðila.
30