Byggingareftirlitið - Skipulagsstofnun

9.08 Niðurstöður
Byggingarfulltrúar hafa almennt aðgang að lögfræðiaðstoð þurfi þeir að beita
úrræðum sem byggingarreglugerð gerir ráð fyrir að beitt sé vegna brota. Sé þessi
kafli skoðaður í samhengi við það sem áður hefur komið fram í skýrslunni verður
þó að telja að fremur lítið reyni á þessa aðstoð hvað varðar þessar einstöku aðgerðir
þar sem vart verða dregnar aðrar ályktanir en þær að úrræðum gagnvart brotum sé
lítið beitt.
Yfirgnæfandi meirihluti stéttarinnar telur þörf á verklagsreglum sem fjalla um
hvernig beita á þvingunarúrræðum. Í því sambandi er einnig talin þörf á að
skilgreina brot byggingarstjóra og hönnuða nánar, t.d. tilskilin lágmarksgæði
hönnunargagna.
Í raun kemur þar aftur fram það sama og áður, að þörf sé stefnumótunar um
hvernig heppilegast sé að embættin taki á algengustu brotum hönnuða og
byggingarstjóra, enda telur hluti byggingarfulltrúa sig ekki sinna eðlilegri yfirferð
yfir gögn einstakra hönnuða heldur sé þar um prófarkalestur að ræða. Eins hefur
áður verið bent á ýmsa aðfinnsluverða þætti gagnvart byggingarstjórum.
Telja verður að byggingarfulltrúar gefi ekki annað til kynna en að þeir séu
þokkalega sáttir við byggingarreglugerðina eins og hún er í dag. Þeir vilja þó
sumir að hún verði á vissan hátt notendavænni og framsetningin hnitmiðaðri.
Varðandi breytingar á byggingarreglugerð er talið æskilegt að meiri festu gæti
gagnvart því hvenær henni er breytt og hvernig breytingarnar eru kynntar.
Einhver hluti byggingarfulltrúa telur æskilegt að hægt sé að taka á málum eftir
mikilvægi þannig að afgreiðsla smáverka verði einfaldari en afgreiðsla flóknari
mála. Talin er þörf á samræmdri túlkun helstu heimildarákvæða, þá hugsanlega
sem hluta af gæðahandbók eða almennum leiðbeiningum.
Eins og kemur fram í þessari skýrslu er nokkuð um að byggingarfulltrúar geri
athugasemdir vegna hönnunargagna. Þær athugasemdir tengjast að öllu jöfnu því
að hönnunargögnin uppfylla ekki kröfur byggingarreglugerðar.
114