Byggingareftirlitið - Skipulagsstofnun

9.0 Stjórnvaldsaðgerðir
9.01 Samantekt
Mikill meirihluti byggingarfulltrúa nýtur lögfræðiaðstoðar ef beita þarf þeim
úrræðum sem byggingarreglugerð heimilar að beitt sé vegna brota. Þrátt fyrir að
slík aðstoð sé í mörgum tilvikum aðgengileg telja nánast allir aðspurðir þörf á
leiðbeiningum eða verklagsreglum stjórnvalds vegna slíkra mála.
Nokkuð eru skiptar skoðanir meðal byggingarfulltrúa um hvort þau úrræði
gagnvart brotum sem fyrir hendi eru í byggingarreglugerð séu fullnægjandi. Það
álit kemur oft fram að úrræði séu vissulega fyrir hendi, þau að öllum líkindum
fullnægjandi, en gjarnan skorti styrk til að beita þeim. Einnig geti komið fram
mismunandi álit sveitarstjórnar og byggingarfulltrúa um það hvort þörf sé á að
úrræðum sé beitt.
Kerfið er talið af sumum mjög þungt og hægvirkt. Nær allir byggingarfulltrúar
telja því mikilvægt að fyrir hendi séu verklagsreglur eða leiðbeiningar til nánari
skýringa á þessum ákvæðum. Það vanti meðal annars skilgreiningu á því í hverju
brot teljist vera fólgið.
Varðandi byggingarreglugerð virðast byggingarfulltrúar yfirleitt sáttir. Benda þó á
þörf ákveðinnar aðlögunar. Heppilegt væri t.d. að sérstök ritstjórn stýrði allri
endurnýjun og breytingum. Einnig er talin þörf á að gera reglugerðina
notendavænni.
Fram kom það álit að mikilvægt sé að sköpuð sé aðstaða til að tryggja betri
undirbúning verka. Hönnuðum sé gert að hanna það sem vanrækt er í dag eins og
t.d. að taka afstöðu varðandi hljóðvistarmál.
Hvað snertir almenna starfsaðstöðu er talið mjög mikilvægt að skýrar leiðbeiningar
séu fyrir hendi varðandi túlkun og framkvæmd mikilvægra ákvæða. Einnig sé þörf
á verklagsreglum. Jafnframt er talin þörf á leiðbeiningum um stjórnsýslumál.
Heppilegt er talið að gefin væri út „gæðahandbók“ þar sem fram kæmu skýringar,
leiðbeiningar og verklagsreglur.
107