14_Saudiña - Sergas

En ensino secundario preguntouse polas
horas a que tiñan que chegar á casa
os venres e os sábados, tema que na
adolescencia provoca moitas
reivindicacións. Resultou que nas respostas
ata as 10 da noite, de 12 a 2 da mañá
e non saio, a porcentaxe máis alta é a de
rapazas, mentres que nas respostas de 2 a 5,
sen límite e cedo gañan os rapaces.
Cando se lles preguntou se, polo xeral, vían
que ás rapazas se lles obrigaba a chegar
antes á casa e se iso era xusto, o 56%
delas din que si teñen que chegar antes
e que non é xusto. O 60% dos homes din
o mesmo e o motivo que dan con maior
frecuencia os dous sexos para atopalo
inxusto é que homes e mulleres deben ter
os mesmos dereitos.
Polo que respecta aos xuízos que fan sobre
os comportamentos relacionados coas
saídas de lecer, os dous sexos opinan igual
sobre a tolerancia de que un mozo ou unha
moza se “emborrache” as fins de semana
(para o 55% é tolerable), sobre que fumar
non achega nada ás mulleres (no caso dos
homes eles non o teñen tan claro) e en que a
vestimenta é máis importante para elas que
para eles se pretenden ligar. Ademais, un de
cada catro homes é máis conservador na
vestimenta das rapazas se lle son familiares
ou amigas. Parece que nalgúns aspectos se
romperon os prexuízos sexistas pero noutros
permanecen, e máis nas respostas do sexo
masculino que do feminino.
Un ámbito en que claramente permanecen
os prexuízos é no das relacións sexuais.
As rapazas son criticadas en maior medida
por ambos os sexos se se lían con varios
rapaces. Critícanas o 58% dos homes e o
47% das mulleres, fronte ás críticas do
39% que reciben os homes das femias e do
24% que reciben do seu sexo. Este é outro
campo onde aparece a necesidade de
traballar pola igualdade de xénero.
Pasando ao ámbito escolar, preguntóuselles
polos comportamentos ante agresións por
parte dos/das seus/súas compañeiros/as.
Ante as agresións verbais, elas reaccionan
dicíndollo a un/ha profesor/a, contestando,
pasando, aguantando, sentíndose mal e
falando, pero se a agresión vén por parte
dunha muller a cuarta parte tamén contesta
cunha resposta física. Eles diferéncianse en
que non se senten mal e en que contestan
con agresións físicas (menos da metade se
os agrediu un home e a sexta parte se foi
unha muller).
Ante as agresións físicas por parte dun
compañeiro, elas reaccionan con
porcentaxes do 25% coas respostas
pegándolle e dicíndollo a un/ha profesor/a.
Se a agresión vén dunha compañeira a
metade recorrería a unha contestación
física. O 68% dos rapaces reacciona ante
agresións dun home pegándolle, porcentaxe
que baixa ao 25% se os agrediu unha
compañeira. Como se ve nas respostas dos
homes aparecen con máis frecuencia as
agresións físicas.
Cando se lles pregunta polo sexo máis
conflitivo na aula, contestan que os
homes, con moita diferenza con respecto
ás mulleres. A causa segundo os dous
sexos é que eles son máis brutos, e
ademais algúns deles xustifícanse coa súa
condición biolóxica.
Din que acostuman obedecer por igual ás
profesoras que aos profesores, pero a eles
dálles igual falar dos seus problemas cun
profesor que cunha profesora ou ter titor ou
titora, mentres que elas reparten as súas
preferencias entre as opcións prefiro falar
cunha profesora e dáme igual, e prefiro ter
unha titora e dáme igual. Os dous sexos
non perciben discriminación sexual por
parte do profesorado.
Tamén preguntamos polos estudos e saídas
profesionais. As respostas indican que a
maioría das rapazas queren estudar
bacharelato, mentres que os rapaces
prefiren ciclos formativos. En consonancia
con esta resposta está que de maiores ás
mulleres gustaríalles desenvolver traballos
que requiren títulos universitarios, e aos
homes traballos relacionados coa formación
profesional. Quizais aquí se puidese
investigar se ten que ver con prexuízos
sexistas sobre os estudos e traballos, coas
condicións laborais dos traballos a que
conducen eses prexuízos e cos resultados
académicos, relacionados pola súa vez co
comportamento nas aulas, variable
que xa apareceu.
De feito indagouse sobre os estereotipos de
repartición de traballos por sexos.
Púxoselles na situación hipotética de que
debían contratar unha persoa para cada un
de varios postos nunha grande empresa.
Resultou que os dous sexos obedeceron a
85