Ársskýrsla 2007 - BTB

Ársskýrsla 2007
102
Landsbankinn er virkur aðili að stærstu frjálsu samtökum fyrirtækja um samfélagslega
ábyrgð, Hnattrænum samningi Sameinuðu þjóðanna (UN Global Compact).
Á þessum samstarfsvettvangi vinna fyrirtæki, stofnanir Sameinuðu þjóðanna,
verkalýðshreyfingar, fulltrúar samfélaga og ríkisstjórnir í sameiningu að því að
kynna viðmið á sviði mannréttinda, atvinnu- og umhverfismála og vinna gegn
spillingu. Landsbankinn hefur einnig lýst yfir stuðningi við Leiðbeiningar OECD
fyrir fjölþjóðleg fyrirtæki og var meðal þeirra fyrstu sem skrifuðu undir Alþjóðlega
yfirlýsingu fjármálastofnana (International Declaration of Financial Institutions
(UNEP-FI)) um umhverfismál og sjálfbæra þróun.
Á komandi árum mun umhverfisvernd verða æ mikilvægari í stefnuskrá bankans.
Landsbankinn hefur mótað sína eigin umhverfisstefnu sem er ætlað að bæta
frammistöðu bankans í umhverfismálum.
Árið 2007 stofnaði Landsbankinn HydroKraft Invest í samvinnu við Landsvirkjun.
Tilgangur þessa nýja fyrirtækis er að fjárfesta í orkuverkefnum erlendis. Flest þessara
verkefna tengjast nýtingu vatnsafls en nokkur þeirra snúa að vinnslu á annars
konar endurnýjanlegri orku. Á Íslandi og hjá íslenskum orkuframleiðendum, þar
sem Landsvirkjun er langstærsta fyrirtækið, er mikil reynsla og þekking á orkuframleiðslu.
Þetta sést meðal annars á því að 72% af allri frumorkuneyslu á Íslandi
kemur frá endurnýjanlegum orkulindum á meðan alþjóðlegt meðaltal er einungis
13%. Landsbankinn hefur fyrir sitt leyti tekið virkan þátt í fjármögnun verkefna á
sviði endurnýjanlegrar orku og er HydroKraft Invest til marks um aukna áherslu
bankans á þessa mikilvægu grein. Það er mat Landsbankans að eftirspurn eftir
endurnýjanlegri orku muni aukast umtalsvert á næstu árum. HydroKraft Invest
byggir á sameinaðri fjármálaþekkingu starfsmanna bankans og tæknilegri þekkingu
Landsvirkjunar á byggingu og rekstri orkuvera og -kerfa og því má búast við
að fyrirtækinu séu flestir vegir færir í framtíðinni.
Í fyrstu mun HydroKraft Invest aðallega fjárfesta í vatnsorkuverum í Evrópu þar
sem auka má framleiðni og skilvirkni, hvort sem er með því að endurbæta tækjakost
eða stjórnarhætti.
Með fjárfestingarstefnu sinni vill Landsbankinn styðja nýjar hugmyndir, tækni og
lausnir til að koma til móts við sívaxandi kröfur um að efnahagsleg þróun styðji
góða umgengni um náttúruna og umhverfið.
Aðgerðir gegn loftslagsbreytingum
Bankastjórar Landsbankans voru í hópi fulltrúa þeirra 153 fyrirtækja sem skrifuðu
undir yfirlýsingu sem hvatti ríkisstjórnir til að samþykkja, eins fljótt og auðið yrði,
aðgerðir til að tryggja raunhæfar heildarlausnir í loftslagsmálum eftir árið 2012
þegar Kyoto-bókunin rennur út.