Ársskýrsla 2007 - BTB

61
Landsbankinn
Fyrirtækjaviðskipti
Á árinu 2007 gegndi Landsbankinn enn sem fyrr meginhlutverki
í fjármögnun atvinnulífs á Íslandi með um 40% hlutdeild
í fyrirtækjaviðskiptum á innanlandsmarkaði. Landsbankinn hélt
einnig áfram sókn sinni inn á alþjóðlega markaði á sviði fyrirtækjaviðskipta.
Ný útibú voru opnuð þar sem megináhersla
er lögð á fyrirtækjaviðskipti, t.d. í Osló og Halifax í Kanada.
Útibúin, sem opnuð voru í Helsinki í Finnlandi og Hong Kong,
munu að hluta til helga sig fyrirtækjaviðskiptum.
Á árinu 2007 var af hálfu Landsbankans lögð meiri áhersla á bæði eignatengd lán
(e. asset-based lending) og hráefnis- og birgðafjármögnun (e. trade finance). Hráefnis-
og birgðafjármögnun mun verða mikilvægur hluti af starfsemi nýju útibúanna
í Kanada og Noregi. Skrifstofan í Hong Kong mun líka leggja áherslu á þessa
starfsemi. Landsbankinn styrkti stöðu sína í lánastarfsemi, bæði innanlands og
erlendis, og jók mjög við þessa starfsemi á árinu í útibúum sínum utan Íslands.
Traust og vel dreift útlánasafn
Styrkur og gæði lánasafns Landsbankans er forsenda fyrir vexti hans og stöðu sem
alþjóðlegs fyrirtækjabanka. Aukin dreifing áhættu hefur verið mikilvægur þáttur í
vaxandi starfsemi bankans erlendis á undanförnum árum. Útlán til fyrirtækja í lok
árs 2007 námu 1.665 milljörðum króna (18,2 milljónum evra) og var hlutfall þeirra
82% af heildarútlánum bankans. Þetta hlutfall hækkaði úr 79% árið 2006. Útlán
samstæðunnar til fyrirtækja jukust um 44% á milli ára. Ítarlega er fjallað um ýmsa
áhættuþætti fyrirtækjaútlána Landsbankans í kaflanum um áhættustýringu.
Útlán bankans til fyrirtækja eru af ýmsum gerðum. Þar má nefna hefðbundin lán
til innlendra fyrirtækja í öllum greinum með starfsemi á Íslandi og erlendis en
einnig er um að ræða þátttöku erlendra útibúa bankans í fjármögnun alþjóðlegra
fyrirtækja. Auk þess býður Landsbanki Heritable Bank í London litlum og meðalstórum
fyrirtækjum upp á fjölbreytta fjármögnunarmöguleika. Fyrirtækjalán
Landsbankans dreifast þannig á nær allar atvinnugreinar og til fjölda landa.
Til þess að fylgja eftir árangursríkri starfsemi útibúa á Bretlandi og á meginlandi
Evrópu, auk innkomu á norrænan markað, stefnir Landsbankinn að því að dreifa
útlánum enn frekar milli landa og atvinnugreina. Opnun nýrra útibúa í Noregi og
Kanada á árinu er liður í þeim áherslum. Það er því rökrétt skref í vexti bankans að
horfa til Bandaríkjanna og Kyrrahafssvæðis Asíu og í lok ársins opnaði Landsbankinn
skrifstofu í Hong Kong. Þessar nýju starfsstöðvar munu leggja megináherslu á
hráefnis- og birgðafjármögnun.