Ársskýrsla 2007 - BTB

39 Landsbankinn
Við lausafjárstýringu fer bankinn eftir reglum Seðlabankans um lausafjárhlutfall,
það er hlutfall veginna lausafjáreigna af lausafjárskuldum. Reglurnar kveða á um að
hlutfallið skuli vera hærra en 1 þegar litið er til næstu þriggja mánaða. Reglur Seðlabankans
fela í sér nokkurs konar álagspróf þar sem eigna- og skuldaliðir eru vegnir
með stuðlum. Álagsprófið endurspeglar hversu aðgengileg eign í lausafjárkreppu er
og hversu mikil þörf er á að greiða viðkomandi skuldbindingu tímanlega.
Lausafjárhlutfall bankans var 2,23 í lok árs 2007 og er það reiknað með því að
vega og meta eignir og skuldir bankans samkvæmt reglum Seðlabanka Íslands nr.
317/2006 um lausafjárhlutfall.
Landsbankinn hefur sett sér innri reglur um erlenda lausafjárstöðu. Reglurnar taka
til lausafjáráhættu til skamms tíma og lengri tíma. Lykilviðmiðun þessara reglna er
að tryggja að bankinn eigi lausafé til að mæta aðstæðum þar sem aðgengi að fjármagni
er lokað í allt að 12 mánuði á meðan bankinn borgar allar skuldbindingar,
sem falla á gjalddaga, auk annarra innlána, sem eru viðkvæm fyrir breytingum,
og heldur um leið óbreyttri starfsemi. Frekari umfjöllum má finna í kaflanum um
fjármögnun og lausafé.
Eigið fé og álagspróf FME
Landbankinn stýrir eigin fé sínu til að uppfylla kröfur Fjármálaeftirlitsins (FME) um
eigið fé. FME gerir kröfu um að Landsbankinn haldi nægu eigin fé til að uppfylla
lágmarkskröfur um eiginfjárhlutfall skv. reglum um eiginfjárkröfu og áhættugrunn
fjármálafyrirtækja, nr. 215/2007. Þessar reglur eru byggðar á viðmiðunarreglum
Basel-nefndarinnar um bankaeftirlit í Basel II-reglunum. Lágmarkskröfur
eru sýndar sem hlutfall af eigin fé af áhættuvegnum eignum.
Landsbankinn hefur sett sér viðmiðanir um eiginfjárhlutfall (eiginfjárþátt B) yfir
10%, sem er töluvert umfram 8% lágmarkskröfur FME. Að mati bankans er með
þessu tekið tillit til samsetningar á rekstri bankans með hliðsjón af viðskiptabankaog
fjárfestingarbankastarfsemi annars vegar og af þeirri áhættu sem bankinn er
reiðubúinn að taka í markaðsverðbréfum hins vegar. Eiginfjárhlutfall Landsbanka
Íslands skv. reglum um eiginfjárhlutfall var í árslok 2007 11,7%, þar af 10,1% eiginfjárþáttur
A.
Íslensku bankarnir eru reglulega álagsprófaðir af FME til að meta getu þeirra til að
takast á við áföll í efnahagsmálum. Álagsprófið gerir ráð fyrir að eftirtaldir atburðir
gerist allir á sama tíma: i) 35% lækkun á virði innlendra hlutabréfa og 25% lækkun
á virði erlendra hlutabréfa í eigin áhættu, ii) 20% lækkun á virði vaxtafrystra/virðisrýrðra
útlána og fullnustueigna, iii) 7% lækkun á virði markaðsskuldabréfa í eigin
áhættu og iv) 20% veiking íslensku krónunnar gagnvart erlendum gjaldmiðlum.