Ársskýrsla 2007 - BTB

93 Landsbankinn
Stjórnarhættir Landsbankans
Landsbankinn er í fararbroddi íslenskra fyrirtækja við að fylgja
góðum stjórnarháttum og tryggja að þeir séu í samræmi við
bestu framkvæmd á hverjum tíma. Innan Landsbankans nær
hugtakið góðir stjórnarhættir til ýmissa þátta í starfsemi bankans.
Þar má nefna stjórnskipulag, upplýsingagjöf, reglur og
verkferla sem eru hluti af starfsemi og rekstri bankans.
Bankaráð Landsbankans átti frumkvæði að því að bankinn var eitt fyrsta íslenska
fyrirtækið sem innleiddi Leiðbeiningar um stjórnarhætti fyrirtækja sem OMX Nordic
Stock Exchange á Íslandi, Samtök atvinnulífsins og Verslunarráð Íslands gáfu
út árið 2004. Landsbankinn hefur einnig tekið upp innri siða- og verklagsreglur og
gaf út regluhandbók þar sem finna má greinargott yfirlit yfir innri reglur bankans.
Innri reglur Landsbankans hafa verið settar til þess að bankinn uppfylli ströngustu
kröfur um stjórnarhætti sem gerðar eru á alþjóðavettvangi og er ætlað að tryggja
gagnsæi og gott upplýsingaflæði.
Landsbankinn endurskoðar innri reglur sínar og innra skipulag reglulega til þess
að tryggja að þær séu ávallt í samræmi við gildandi lög og reglur. Árið 2007 var
mikil vinna lögð í að endurskoða og koma á nýjum reglum og verkferlum á samstæðugrunni.
Góðir stjórnarhættir Landsbankans endurspeglast meðal annars í traustri uppbyggingu
starfseminnar á samstæðugrunni, góðu aðgengi að upplýsingum, vandaðri
ákvarðanatöku og öflugu eftirliti með öllum áhættuþáttum. Markmið bankans
er að tryggja heilbrigðan og traustan rekstur sem og viðeigandi upplýsingaflæði til
hluthafa, annarra markaðsaðila og eftirlitsaðila í þeim lögsögum þar sem Landsbankinn
er með starfsemi. Að auki styðst bankinn við vandaða umgjörð sem ætlað
er að koma í veg fyrir hagsmunaárekstra í ákvarðanatökuferlum og tryggja að
starfsemin sé í samræmi við mismunandi lagalegan áskilnað og ströngustu kröfur
um góða starfshætti.
Þær reglur um stjórnarhætti sem bankaráð Landsbankans hefur innleitt eru einnig
notaðar sem meginviðmið um góða stjórnarhætti innan dótturfélaga Landsbankans.
Hluthafafundir
Hluthafafundur fer með æðsta vald í málefnum Landsbankans innan þess ramma
sem samþykktir bankans og landslög mæla fyrir um. Þátttökurétt á hluthafafundum
eiga hluthafar, umboðsmenn þeirra og ráðgjafar, en auk þess eru fundirnir
opnir fjölmiðlum og fulltrúum Kauphallarinnar. Allir hluthafar eiga jafnan rétt