Ársskýrsla 2007 - BTB

Ársskýrsla 2007
104
Viðmið um siðferðilegt athæfi eru nú hluti af lánveitinga- og fjárfestingarathugun
bankans, sem framkvæmd er í tengslum við öll viðskipti. Sérstaklega er fylgst með
athæfi sem kann að hafa neikvæð áhrif á umhverfið og sjálfbæra þróun, svo sem
ofnýtingu sjávarauðlinda og veiðum á fiskistofnum sem kunna að vera umdeildar
út frá sjónarhóli umhverfisverndar eða vegna siðferðilegra sjónarmiða. Árið 2006
herti bankinn reglur sínar um lánveitingar í þeim tilgangi að koma í veg fyrir að að
fjármagn frá bankanum sé nýtt á skjön við ofangreind markmið.
Innanhússreglur um samfélagslega ábyrgð
Í Landsbankanum starfar nefnd um samfélagslega ábyrgð fyrirtækja undir forystu
yfirstjórnenda. Nefndin hefur umsjón með yfirgripsmiklum styrkveitingum
bankans á Íslandi og fylgist með því hvort starfsemi bankans sé í samræmi við
væntingar hagsmunasamtaka á svæðinu. Stefnan um samfélagslega ábyrgð er
mikilvægur liður í allri starfsemi Landsbankans og er reglulega til umræðu í fastanefndum
á borð við lána- og fjármálanefnd.
Eitt af meginmarkmiðum samfélagsstefnu bankans er að laða að starfsfólk sem
hefur svipaðar hugmyndir um samfélagslega ábyrgð og finna má í fyrirtækjamenningu
bankans. Auk formlegra verkferla og viðmiða hvetur Landsbankinn
starfsfólk sitt til að taka virkan þátt í starfi sem stuðlar að félagslegri velferð.
Skattgreiðslur og styrkveitingar
Skattgreiðslur Landsbankans og starfsfólks hafa aukist verulega í samræmi við
aukin umsvif og hagnað bæði hérlendis og utan landsteinanna. Auknar skatttekjur
sem rekja má til stækkunar bankans bæta afkomu ríkissjóðs og skila sér þannig
beint til samfélagsins.
Styrkveitingar hafa verið einn mikilvægasti liðurinn í samfélagsverkefnum Landsbankans.
Á Íslandi hefur Landsbankinn verið framarlega í því að styrkja verkefni á
sviði mannúðar, menningar, menntunar og íþrótta- og æskulýðsmála. Á 120 ára
afmæli Landsbankans 2006–2007 var stuðningur bankans við samfélagsmál meiri
en hjá nokkru öðru fyrirtæki í Íslandssögunni.
Stuðningur við Makeba-stúlknaathvarfið í Jóhannesborg
Í tilefni opnunar hins nýja sendiráðs Íslands í Pretoríu í Suður-Afríku í febrúar 2007
ákváðu Landsbankinn og fleiri aðilar að styðja gott þarlent málefni. Ákveðið var
að veita Makeba-stúlknaathvarfinu í Midrand í nágrenni Jóhannesborgar umtalsverðan
stuðning. Athvarfið hefur verið starfrækt síðan 2003 og hefur bjargað lífi
fjölda stúlkna sem hafa orðið fyrir líkamlegu og andlegu ofbeldi.