Ársskýrsla 2007 - BTB

47 Landsbankinn
Rekstraráhætta
Rekstraráhætta er hættan á því að bankinn verði fyrir fjárhagslegu tjóni vegna
ófullnægjandi eða gallaðra verkferla eða kerfa, mistökum starfsfólks eða vegna
utanaðkomandi atvika. Lagaleg áhætta telst til rekstraráhættu, en ekki hætta á
rýrnun orðstírs. Rekstraráhætta er því til staðar í allri starfsemi Landsbankans.
Framkvæmdastjóri hvers sviðs ber ábyrgð á rekstraráhættu sviðsins, en dagleg
stjórn á rekstraráhættu er á ábyrgð forstöðumanna deilda. Landsbankinn
hefur umsjón með og samræmir stýringu á rekstraráhættu á samstæðugrunni.
Áhættustýringarferlið er í samræmi við „Sound Practice for the Management and
Supervision of Operational Risk“ sem Basel-nefndin gaf út árið 2003 og uppfyllir
einnig nýjar reglur um gjaldþol sem tóku gildi 1. janúar 2008. Samstæðan hefur
ákveðið að nota grundvallaraðferð (e. „Basic Indicator approach“) til að reikna út
lögbundið eiginfjárhlutfall sitt.
Til að tryggja samhæfða stjórn rekstraráhættu á samstæðugrunni notar Landsbankinn
kerfi sem er bæði fyrirbyggjandi og felur í sér eftirlit. Um er að ræða
ítarlega verkferla, stöðuga umsjón og tryggingar, ásamt virku eftirliti sem er í
höndum innri endurskoðunar. Slíkri umsjón með rekstraráhættu er ætlað að
tryggja að allar starfseiningar bankans séu vel meðvitaðar um rekstraráhættu, að
stöndugt eftirlitskerfi sé til staðar og að eftirlitsþáttum sé framfylgt á skilvirkan
og áhrifaríkan hátt.
Við mat á rekstraráhættu styðst bankinn við ýmsar aðferðir sem þróaðar hafa verið
síðastliðin ár. Þar á meðal er reglubundið sjálfsmat framkvæmt af stjórnendum allra
starfseininga, þar sem metin er líkleg tíðni og mögulegar fjárhagslegar afleiðingar,
til að greina helstu áhættuþætti eininganna. Góð undirstaða að mati og greiningu
á rekstraráhættu fæst með því að rekja fjárhagslegt tjón sem af henni hefur hlotist.
Nota má ýmsa áhættuvísa til að greina breytingar á rekstraráhættu.
Ítarlegar reglur og verklagsferlar mæla fyrir um hvernig starfsmenn eigi að haga
vinnu sinni fyrir bankann. Innri reglur bankans eru sífellt til endurskoðunar og
er reglum og ferlum breytt í samræmi við nýjar áherslur. Bankinn býður starfsmönnum
sínum einnig aðgang að víðtækri þjálfun og menntun til að auka enn
frekar á þekkingu og færni þeirra.
Talsverð áhætta tengist upplýsingatæknikerfum sem fjármálafyrirtæki nota í starfsemi
sinni. Stöðugt er unnið að þróun og endurbótum á upplýsingatæknikerfum
Landsbankans. Áhætta þeim tengd er metin reglulega og er mótvægisaðgerðum
til að draga úr áhættu beitt hvar sem því verður við komið. Öryggisafrit eru tekin
af öllum helstu hlutum kerfisins, á borð við aðalgagnageymslur, og eru afritin
samkeyrð og hýst á sérstökum stöðum, í samræmi við stefnu bankans um stýringu
á rekstraráhættu.