Ársskýrsla 2007 - BTB

13 Landsbankinn
Efnahagsmál og fjármálamarkaðir
Á fyrri hluta ársins 2007 voru aðstæður á fjármálamörkuðum
Landsbankanum hagstæðar, vöxtur var stöðugur og almenn
bjartsýni ríkjandi. Á sama tíma dró úr umsvifum á fasteignamörkuðum
víða um heim eins og vænst hafði verið. Þegar leið
á árið komu fram vandamál vegna hratt vaxandi greiðslubyrði
svokallaðra undirmálslána í Bandaríkjunum þegar vextir á þeim
hækkuðu verulega. Með haustinu breytti undirmálslánakreppan
í Bandaríkjunum aðstæðum á mörkuðum verulega; fjármögnunarkostnaður
hækkaði og í kjölfarið fór eignaverð lækkandi.
Þrátt fyrir þetta var vöxtur í íslenska hagkerfinu umfram spár
en almennt hafði verið reiknað með því að verulega myndi
hægja á hagkerfinu á árinu.
Mikill vöxtur var enn í fjárfestingum öðrum en stóriðju sem
og einkaneyslu sem var knúin áfram af vaxandi kaupmætti
og auðsáhrifum. Nú lítur út fyrir að hagvöxtur á árinu 2007
hafi verið tæplega 4%. Viðskiptahallinn minnkaði á árinu í
kjölfar þess að innflutningur fjárfestingarvara dróst saman og
álútflutningur fór vaxandi. Vextir af íbúðalánum hækkuðu á
árinu og undir lok árs sáust merki um minnkandi umsvif á innlendum
fasteignamarkaði. Fjármögnunarkostnaður hér á landi
hækkaði eins og víðar en versnandi lánskjör má rekja til aukinnar
áhættufælni í kjölfar undirmálslánakreppunnar.
Íslenska hagkerfið
Búist var við minnkandi hagvexti árið 2007 eftir áralanga uppsveiflu. Hagvöxtur
árið 2007 virðist hins vegar hafa verið vel yfir flestum spám, eða 3,8%. Í upphafi árs
bentu ýmsar vísbendingar til þess að hægt hefði á hagkerfinu en á öðrum ársfjórðungi
hafði hagkerfið tekið við sér á nýjan leik og innlend eftirspurn jókst á ný.
Fjárfesting í álframleiðslu og tengdum orkuverum minnkaði á árinu þótt samdrátturinn
hafi verið hægari en búist hafði verið við vegna tafa á byggingu Kárahnjúkavirkjunar.
Fjárfesting í húsnæði jókst áfram á meðan húsnæðisverð hækkaði
hratt þar til 12 mánaða aukning hennar náði 15% í lok árs.