Ársskýrsla 2007 - BTB

Ársskýrsla 2007
112
Bankaráð
Björgólfur Guðmundsson útskrifaðist frá Verzlunarskóla Íslands. Hann var forstjóri
Hafskips hf. um árabil. Björgólfur á tæplega helmingshlut í Samson eignarhaldsfélagi
ehf. og er einnig aðaleigandi og stjórnarformaður knattspyrnufélagsins
West Ham United í Englandi. Hann var fyrst kosinn formaður bankaráðs
Landsbankans í febrúar 2003 eftir kaup Samson eignarhaldsfélagsins á nær 45%
eignarhlut í bankanum af íslenska ríkinu. Björgólfur hefur setið í stjórnum fjölda
atvinnufyrirtækja, félagasamtaka og stofnana á innlendum og erlendum vettvangi.
Björgólfur er ákafur stuðningsmaður menningar, íþrótta og æskulýðsmála
og í janúar árið 2005 veitti forseti Íslands honum fálkaorðuna fyrir framlag hans
til viðskipta og menningar. Hann er formaður starfskjaranefndar Landsbankans.
Svafa Grönfeldt útskrifaðist frá Háskóla Íslands árið 1990 með BS-próf í stjórnmálafræði
og fjölmiðlafræði. Árið 1995 lauk hún mastersprófi í stjórnun og boðskiptafræði
frá Florida Institute of Technology og árið 2000 lauk hún doktorsprófi í
vinnumarkaðsfræðum frá London School of Economics. Svafa er nú rektor Háskólans
í Reykjavík en árin 2005-2007 var hún aðstoðarforstjóri Actavis Group. Áður
var hún framkvæmdastjóri stjórnunarsviðs Actavis Group (2004-2005), lektor í
Viðskipta- og hagfræðideild Háskóla Íslands (1997-2007) og framkvæmdastjóri og
meðeigandi í IMG Gallup/Deloitte (1995-2004). Svafa var fyrst kosinn í bankaráð
Landsbankans árið 2007.
Kjartan Gunnarsson lauk lagaprófi frá Háskóla Íslands árið 1978 og námi við
Varnarmálaháskóla norska varnarmálaráðuneytisins árið 1980. Hann var framkvæmdastjóri
Sjálfstæðisflokksins frá 1980 til 2006. Kjartan var fyrst kosinn til
setu í bankaráði Landsbankans árið 1992 af Alþingi þegar bankinn var í eigu ríkisins.
Hann var varaformaður og síðar formaður bankaráðs til ársins 1997. Þegar
Landsbankinn varð hlutafélag árið 1997 var hann aftur kosinn varaformaður
bankaráðs. Hann var stjórnarformaður Líftryggingafélags Íslands 1997-2003 og
Vátryggingarfélags Íslands 1997-2002 og hefur setið í stjórn dótturfélags Landsbankans,
Landsbanki Heritable Bank Ltd, í London síðan í mars 2003. Kjartan er nú
formaður endurskoðunarnefndar Landsbankans.
Þorgeir Baldursson útskrifaðist frá Verzlunarskóla Íslands árið 1960 og lauk MGK
gráðu frá Den Grafiske Høskole í Danmörku 1965. Hann starfaði sem framleiðslustjóri
Prentsmiðjunnar Odda frá 1965 og tók við starfi forstjóra árið 1982. Þorgeir
sat í stjórn Samtaka atvinnulífsins frá 1999 til 2006 og hefur setið í stjórnum
allmargra íslenskra fyrirtækja frá árinu 1982. Hann hefur verið stjórnarformaður
SP-Fjármögnunar, dótturfélags Landsbankans, frá 1995. Þorgeir var útnefndur
ræðismaður Spánar á Íslandi árið 2000. Hann var fyrst kosinn í bankaráð Landsbankans
árið 2003 og er nú í endurskoðunarnefnd Landsbankans.