Ársskýrsla 2007 - BTB

63 Landsbankinn
Alhliða fyrirtækjaþjónusta
Í meira en 120 ár hefur Landsbankinn gegnt forystuhlutverki við fjármögnun
atvinnulífs á Íslandi. Landsbankinn hefur það að markmiði að vera ætíð fremstur
í alhliða þjónustu við íslensk fyrirtæki. Á innanlandsmarkaði hafa starfsemi Fyrirtækjasviðs
og útlán útibúa lagt grunninn að styrk bankans með uppbyggingu
trausts og vel dreifðs útlánasafns. Fyrirtækjaútlán Landsbankans skiluðu hagnaði
fyrir skatta upp á 24,6 milljarða króna árið 2007, samanborið við 16,6 milljarða
króna árið áður.
Landsbankinn hefur langa hefð fyrir því að veita öllum greinum íslensks efnahagslífs
trausta og örugga fjármálaþjónustu. Í Landsbankanum er fyrir hendi
mikil reynsla og alhliða þekking á lánamálum fyrirtækja. Starfsmenn búa jafnframt
yfir mikilli sérþekkingu á einstökum atvinnugreinum. Sérfræðingar bankans
veita fyrirtækjum alhliða þjónustu og einnig sérhæfðar lausnir sniðnar að þeirra
þörfum, persónulega leiðsögn og sérfræðilega ráðgjöf. Fyrirtækjasérfræðingum í
innlendum útibúum bankans hefur fjölgað mikið á undanförnum árum sem hefur
bætt þjónustuna við smærri og meðalstór fyrirtæki. Fyrirtækjasviði Landsbankans
á Íslandi er skipt upp í margar sérhæfðar einingar. Á Fyrirtækjasviði hafa öll fyrirtæki
í viðskiptum fasta viðskiptastjóra sem veita alhliða og sérhæfða þjónustu.
Varfærin útlánastefna
Allar ákvarðanir um útlán til fyrirtækja eru samhæfðar í allri bankasamstæðunni
í lánanefnd bankans sem starfar í Reykjavík. Starf lánanefndar tryggir samræmi
og góða heildarsýn yfir alla útlánastarfsemina. Samfara auknum útlánum til
starfsemi viðskiptavina erlendis hefur bankinn ráðið fleiri sérfræðinga staðsetta á
Íslandi til þess að aðstoða við útlán af þessu tagi.
Landsbankinn fylgist vel með stöðu og rekstrarhorfum í einstökum atvinnugreinum
og er það hluti af stefnu bankans um að hvetja til ábyrgra viðhorfa um fjármál.
Með því að fylgjast grannt með þróuninni innan ákveðinna atvinnugreina getur
bankinn greint hættumerki og gætt meiri varfærni en ella við lánveitingar. Til að
gera slíkt eftirlit sem best úr garði hefur greiningarstarf varðandi atvinnugreinar
og markaði verið eflt auk þess sem skýrslugerð til lánanefnda um þróun áhættu
og gæði útlánasafns hefur verið aukin mikið. Enn fremur hafa ýmis útlána- og
eftirlitskerfi vegna fyrirtækjalána verið endurbætt til að bæta áhættumat og fá
nákvæmari mynd af stöðu útlána. Mikið starf hefur líka verið unnið við uppbyggingu
kerfa og þekkingar til að mæta kröfum vegna nýrra reglna sem byggja á Basel
II. Vöruframboð bankans í fyrirtækjaviðskiptum er í sífelldri endurskoðun til að
tryggja að þær vörur, sem í boði eru, byggi á traustum rekstrargrunni til að geta
áfram stutt við innri vöxt og starfsemi á nýjum stöðum.