Ársskýrsla 2007 - BTB

71 Landsbankinn
Fjárfestingabankastarfsemi
Til fjárfestingarbankastarfsemi Landsbankans heyra verðbréfaviðskipti
móðurfélagsins, þrjú dótturfélög sem voru keypt árið
2005: Landsbanki Teather & Greenwood, Landsbanki Kepler
og Merrion Landsbanki, ásamt Bridgewell Group sem keypt var
árið 2007. Landsbanki Teather & Greenwood og Bridgewell
Group voru sameinuð í Landsbanki Securities UK.
Fjárfestingabanki veitir stórum fyrirtækjum, sveitarfélögum og fagfjárfestum víðtæka
fjármálaþjónustu, þar á meðal verðbréfamiðlun, fyrirtækjaráðgjöf, gjaldeyrisviðskipti
og afleiðuviðskipti. Fjárfestingabanki hefur einnig umsjón með
fjárstýringu bankans, skuldastýringu og eigin viðskiptum bankans. Fjárfestingabankastarfsemi
Landsbankans jókst hröðum skrefum á árinu og námu hreinar
þóknanatekjur 31,4 milljörðum króna á árinu sem er aukning um 53% á milli ára.
Samþætting og vöxtur þjónustuþátta
Fjárfestingabankastarfsemi samstæðunnar gekk vel árið 2007 þrátt fyrir niðursveiflu
á fjármálamörkuðum á seinni hluta ársins. Fyrst og fremst var um
innri vöxt að ræða þar sem starfsstöðvar, sem Landsbankinn hafði þegar eignast,
Landsbanki Kepler og Merrion Landsbanki ásamt Landsbanki Securities í London
víkkuðu út og þróuðu nýja þjónustu. Nýjar deildir voru einnig opnaðar í útibúi
Landsbankans í London.
Eina fyrirtækið sem Landsbankinn keypti árið 2007 var Bridgewell, verðbréfafyrirtæki
í London. Bridgewell var sameinað Teather og Greenwood á árinu og
saman mynda fyrirtækin nú nýtt dótturfélag í London, Landsbanki Securities UK.
Í útibúi bankans í London var sett á laggirnar deild miðlunar og þróunar á fjármálaafurðum,
auk skuldabréfaborðs sem leggur áherslu á miðlun skuldabréfa og
stýringu á vaxandi lausafjársafni bankans. Nýtt útibú var opnað í Helsinki með
aðaláherslu á verðbréfamiðlun. Í lok árs réð Landsbankinn hóp af verðbréfamiðlurum
og hlutabréfagreinendum í Osló, en verðbréfamiðlun er viðbót við starfsemina
í útibúi Landsbankans þar.
Frá því Landsbankinn keypti Landsbanki Kepler hefur fyrirtækið breyst úr því að
vera hrein hlutabréfamiðlun yfir í fjárfestingabanka með fimm viðskiptasviðum:
hlutabréfamiðlun, afleiðumiðlun, fyrirtækjaráðgjöf, eignastýringu og skuldabréfaviðskiptum.
Nýjasta viðskiptasviðið, skuldabréfaviðskipti, efldist mjög þegar við
bættist hópur sérfræðinga frá Anthium Finance í París en starfsreynsla þeirra er að
meðaltali 15 ár. Þetta markar upphaf skuldabréfamiðlunar fyrir Landsbanki Kepler
sem stundað hefur hlutabréfamiðlun síðastliðin 10 ár. Þannig hefur skapast tæki-