Ársskýrsla 2007 - BTB

Ársskýrsla 2007
94
á að taka til máls, leggja fram tillögur og greiða atkvæði. Á hluthafafundum fylgir
eitt atkvæði hverri einni krónu í hlutafé og ræður afl atkvæða nema kveðið sé á
um annað í samþykktum eða landslögum. Í ákveðnum tilvikum er samþykkis allra
hluthafa þó krafist. Aukahluthafafundi skal halda þegar bankaráði þykir við þurfa,
samkvæmt fundarályktun eða ef kjörinn endurskoðandi eða hluthafar sem ráða
yfir minnst 1/10 hlutafjár krefjast þess. Aðalfund skal halda fyrir lok aprílmánaðar
ár hvert. Hluthafafundi skal auglýsa í útvarpi og dagblöðum, eða á annan sannanlegan
hátt, með minnst viku en lengst fjögurra vikna fyrirvara. Fundarefni aðalfundar
er birt með fundarboði en endanleg dagskrá og tillögur skulu liggja frammi
hluthöfum til sýnis minnst viku fyrir fundinn. Mál sem ekki eru auglýst í dagskrá
fundarins er ekki unnt að taka til úrlausnar á aðalfundi nema með samþykki allra
viðstaddra hluthafa.
Samþykktir
Í samþykktum Landsbankans er meðal annars lagður grunnur að stjórn bankans
og því hvernig innri málefnum hans skuli háttað. Í samþykktunum eru, auk
ákvæða um reikningshald bankans og endurskoðun, ákvæði um heiti félagsins,
hlutafé þess, hluthafafundi, kosningu stjórnarmanna, starfsemi bankaráðs og þá
ábyrgð og skyldu sem hvílir á bankaráði og bankastjórn.
Bankaráð Landsbankans
Bankaráð Landsbankans fer með æðsta vald í málefnum bankans á milli hluthafafunda
og ber ábyrgð á starfsemi hans. Í bankaráði sitja fimm bankaráðsmenn
og fimm varamenn sem aðalfundur kýs til eins árs í senn. Ávallt er leitast við að
skipan bankaráðsmanna sé í samræmi við skilgreiningu á óhæði stjórnarmanna
sem finna má í Leiðbeiningum um stjórnarhætti fyrirtækja. Í ákvæðum Leiðbeininganna
kemur fram að æskilegt sé að meirihluti stjórnarmanna séu óháðir
félaginu og að minnst tveir stjórnendanna skuli vera óháðir stórum hluthöfum.
Bankaráð metur óhæði einstakra bankaráðsmanna og kynnir niðurstöður matsins
í ársskýrslu bankans. Hver sá sem valinn er til setu í bankaráði skal búa yfir þeirri
menntun og reynslu, auk þekkingar á núgildandi lögum og reglugerðum á sviði
fjármálafyrirtækja, sem telst nauðsynleg til að taka vel upplýstar og meðvitaðar
ákvarðanir með tilliti til hagsmuna hluthafa. Samkvæmt lögum og samþykktum
Landsbankans skal bankaráð setja sér skriflegar starfsreglur. Bankaráð hefur í
samræmi við það sett sér skýrar starfsreglur sem sendar eru Fjármálaeftirlitinu, í
samræmi við lög nr. 161/2002 um fjármálafyrirtæki. Starfsreglur bankaráðs kveða
á um að bankaráð skuli í árlegu árangursmati meta störf sín og verklag og annað
sem betur má fara í starfsemi þess svo uppfylltar séu þær skyldur sem á því hvíla
samkvæmt lögum, reglum og samþykktum bankans. Bankaráð endurskoðar einnig
starfsreglur sínar og aðra þætti stjórnunarstarfa sinna árlega.