Ársskýrsla 2007 - BTB

31 Landsbankinn
Áhættustýring
Hlutverk fjármálastofnana er að takast á við og stjórna áhættu.
Til að vernda fjárhagslegan styrk Landsbankans vinnur áhættustýring
bankans með skilgreint áhættustjórnskipulag og óháð
áhættueftirlit. Aðferðir við mat og mælingu á áhættu eru í
stöðugri þróun.
Áhættureglur og ferlar bankans tryggja að áhættan sé bæði þekkt og mæld og að
eftirlit sé haft með henni. Áhættunni er stýrt til að hún haldist innan þeirra marka
sem bankinn hefur sett sér og samræmist kröfum eftirlitsaðila á fjármálamarkaði.
Bankinn setur sér stefnu um áhættusamsetningu þannig að sveiflur vegna óvæntra
atburða, sem hafa áhrif á bæði eigið fé bankans og afkomu, séu takmarkaðar og
viðráðanlegar.
Áhættuþættir
Landsbankinn flokkar áhættustöður eftir því hvers eðlis áhættan er og skiptir
áhættuþáttunum upp í útlánaáhættu, markaðsáhættu, rekstraráhættu og áhættu
vegna samsetningar eigna og skulda.
Áhættustjórnskipulag
Bankaráð ber ábyrgð á almennri stefnumótun bankans varðandi áhættu og sér
til þess að hún falli að stefnu bankans, reynslu stjórnenda hans, eiginfjárhlutfalli
og áhættusækni. Bankastjórar bera ábyrgð á daglegri stjórnun bankans gagnvart
bankaráði og stýra áhættu bankans í gegnum fastanefndir hans. Auk þess
bera framkvæmdastjórar ábyrgð á starfsemi hvers sviðs gagnvart bankastjórum
og því að áhættan sé í samræmi við starfsreglur bankans. Fastanefndir bankans
eru fimm: Fjármálanefnd, lánanefnd, eignastýringarnefnd, rekstrarnefnd og
áhættunefnd Landsbankasamstæðunnar. Í hverri fastanefnd eru lykilstjórnendur
og áhættustjórar hvers sviðs ásamt bankastjórum.
Fjármálanefnd: Fjármálanefnd bankans hefur eftirlit með áhættuþáttum í starfsemi
bankans og setur takmörk á áhættuskuldbindingar. Nefndin ákvarðar stefnu
varðandi markaðsáhættu. Einnig hefur hún sett nákvæmar reglur um hámarksáhættu
samstæðunnar. Áður en ráðist er í nýjar tegundir viðskipta, nýja gerð
samninga við viðskiptavini eða í eigin reikning bankans þarf að leggja skriflega
greinargerð um áformuð viðskipti fyrir nefndina til umsagnar og ákvarðanatöku.
Fjármálanefnd mótar stefnu í lausafjárstýringu, hefur eftirlit með lausafjárstöðu
og er ráðgefandi um eigna- og skuldasamsetningu bankans.