Ársskýrsla 2007 - BTB

Ársskýrsla 2007
106
Upplýsingatæknisvið
Árangur ársins leiddi af sér jafnt tækifæri sem ógnanir fyrir
upplýsingatækni og bakvinnslu verðbréfa og eignastýringar
sem saman mynda Upplýsingatæknisvið. Á árinu var megináhersla
lögð á að fylgja eftir vexti bankans með uppbyggingu
á nýjum útibúum og stuðningi við þróunarverkefni, en á
sama tíma var unnið áfram í að samþætta og einfalda ferli og
kerfi innan bankans.
Upplýsingatæknisviðið var endurskipulagt á árinu með það að markmiði að styðja
beint við undirliggjandi viðskiptaferli bankans og mikla nálægð við notendur í stað
þess að horfa á einstök kerfi og stuðning við þau. Í þessu ljósi voru öll verkefni
flokkuð eftir einstökum einingum bankans með það að markmiði að auka sérhæfingu
og tryggja skýra ábyrgð á einstökum málaflokkum frá upphafi til enda. Þetta
gefur aukin tækifæri til að styrkja ferli, draga þannig úr rekstraráhættu og stytta
viðbragðstíma.
Á liðnum árum hefur mikil vinna verið lögð í að styrkja innri ferli sem er forsenda
þess að bankinn geti staðið undir þeim vexti sem hefur einkennt hann. Viðurkenning
á þessari vinnu kom á árinu þegar starfsemi bankans á Íslandi hlaut vottun frá
vottunarfyrirtækinu BSI samkvæmt ISO27001 sem er alþjóðlegur staðall á sviði upplýsingaöryggis.
Vottunin náði ekki eingöngu til Upplýsingatæknisviðs heldur allrar
starfsemi bankans á landinu, hvort heldur var í útibúum eða höfuðstöðvum.
Endurbætt ferli, ný kerfi og aukin sjálfvirkni hafa verið lykillinn að því að bakvinnsla
bankans hafi náð að fylgja eftir vexti bankans og gríðarlega auknu viðskiptamagni
samhliða því að dregið hefur verið úr rekstraráhættu með ýmsum
hætti. Sem dæmi um þetta má nefna að fjöldi viðskipta í innlendum skráðum
bréfum hefur tvöfaldast á árunum 2004 til 2007, úr 200 þúsund í 400 þúsund.
Þá hefur fjöldi gjaldeyrisviðskipta fimmfaldast frá árinu 2005 í nærri 200 þúsund.
Þrátt fyrir verulega aukningu í viðskiptamagni hefur tekist að mæta henni án
samsvarandi fjölgunar starfsfólks.
Eins og undanfarin ár var mikil áhersla lögð á að þróa áfram lausnir bankans á internetinu
og fer meginhluti viðskipta bankans nú fram þar. Að jafnaði kom bankinn
út með stórar útgáfur á netlausnum annan hvern mánuð viðskiptavinum bankans
til hagsbóta. Meðal annars var öryggi Einkabanka stóraukið með dreifingu
svokallaðra auðkennislykla til allra notenda. Þá hefur verið lögð sérstök áhersla
á að auka upplýsingagjöf til viðskiptavina um viðskipti á fjármálamörkuðum og
meðal annars var fyrsta lausnin til stofnanafjárfesta gefin út á samstæðugrunni