Ársskýrsla 2007 - BTB

103 Landsbankinn
Yfirlýsingin var undirrituð og birt í kjölfar leiðtogafundar forsvarsmanna fyrirtækja
á vegum Sameinuðu þjóðanna (UN Global Compact Leaders Summit), sem aðalframkvæmdastjóri
Sameinuðu þjóðanna, Ban Ki Moon, boðaði til dagana 5.–6. júlí
2007 í Genf. Yfirlýsingin, „Caring for Climate: The Business Leadership Platform“,
er alþjóðlegt ákall forsvarsmanna fyrirtækja sem margir hverjir tóku þátt í leiðtogafundinum.
Hnattrænn samningur (UN Global Compact) og Umhverfisáætlun
Sameinuðu þjóðanna (UNEP), ásamt Alþjóðaviðskiptaráðinu fyrir sjálfbæra þróun
(WBCSD), stuðluðu að tilurð yfirlýsingarinnar.
Þau fyrirtæki, sem standa að yfirlýsingunni, og í þeim hópi eru 30 fyrirtæki af
Fortune Global 500-listanum, skuldbinda sig til að „taka raunhæf skref til að auka
skilvirkni í orkuneyslu, minnka hlut kolefnis í vörum, þjónustu og verkferlum, setja
sér af frjálsum vilja markmið í þeim efnum og birta upplýsingar um árangurinn
opinberlega á hverju ári“. Einnig hafa þessi fyrirtæki skuldbundið sig til að takast á
við loftslagsbreytingar með skipulegum hætti og byggja upp viðeigandi starfsgetu.
Fyrirtækin hafa samþykkt að vinna með öðrum fyrirtækjum á sama sviði og öðrum
alþjóðlegum viðskiptavinum sínum að því að kynna viðurkennda staðla og setja á
stofn sameiginleg verkefni til að draga úr neikvæðum áhrifum á umhverfið.
Ráðstefnur
Landsbanki Kepler, sem er fjárfestingarbanki og dótturfélag Landsbankans í Evrópu,
hélt alþjóðlega ráðstefnu um nýja orkugjafa í París í febrúar 2007. Á ráðstefnunni
bauðst 200 fag- og fyrirtækjafjárfestum einstakt tækifæri til að hlusta
á og hitta fulltrúa 22 fyrirtækja sem starfa við framleiðslu á endurnýjanlegri og
kolefnislausri orku. Framleiðendur sólarorku voru áberandi og átta evrópsk fyrirtæki,
sem starfa á því sviði, kynntu starfsemi sína. Landsbanki Kepler hélt aðra
ráðstefnu um orkumál í febrúar 2008.
Al Gore, 45. varaforseti Bandaríkjanna og handhafi friðarverðlauna Nóbels, ávarpaði
Orku- og umhverfisráðstefnu Merrion Landsbanki í Dublin á Írlandi, laugardaginn
1. desember 2007. Rúmlega 400 manns hlustuðu á framsöguræðu Gore,
„Græn hugsun: Efnahagsstefna fyrir 21. öldina“.
Ábyrg fjárfestingarstefna
Sívaxandi umsvif Landsbankans á alþjóðlegum mörkuðum ýta undir mikilvægi þess
að marka skýra og ábyrga fjárfestingarstefnu. Hingað til hafa helstu fjárfestingar
og aðalstarfsvettvangur bankans verið á heimamarkaði þar sem þörfin á reglum um
ábyrgar fjárfestingar hefur ekki verið mikil. Hér veita samfélagið og lagaumhverfið
sjálfkrafa aðhald auk þess sem bankinn gjörþekkir sinn heimamarkað. Í ljósi aukinnar
þátttöku á alþjóðlegum markaði vinnur Landsbankinn nú stöðugt að því að skoða
viðmið, ferli og siðareglur sem liggja að baki ábyrgri fjárfestingarstefnu bankans.