Ársskýrsla 2007 - BTB

97 Landsbankinn
Fastanefndir
Bankastjórar bera ábyrgð á daglegum rekstri og áhættustýringu bankans í gegnum
fimm fastanefndir: Lánanefnd, fjármálanefnd, eignastýringarnefnd, rekstrarnefnd
og áhættunefnd samstæðunnar. Nefndirnar eru vettvangur ákvarðanatöku, stýringar
og eftirlits með umsvifum samstæðunnar, t.a.m. útlánaeftirliti, markaðsáhættu
og rekstrarumhverfi.
Lánanefnd hefur umsjón með og samræmir útlánaferli samstæðunnar með útlánareglum
sem byggja á grunnreglum frá bankaráði. Þetta skipulag tryggir að nefndin
hafi góða yfirsýn yfir útlán allrar starfsemi bankans. Lánanefnd ákveður einnig
hámarks útlánaheimild bankans og nýjar lánategundir eru háðar samþykki hennar.
Hlutverk fjármálanefndar er m.a. að hafa eftirlit með fjárfestingarbankastarfsemi
og áhættuþáttum í starfsemi bankans, auk þess að setja reglur um áhættustýringu.
Fjármálanefnd fer einnig yfir fjármögnun bankans og samþykkir nýjar vörur
sem bjóða á viðskiptavinum í tengslum við verðbréfaviðskipti.
Eignastýringarnefnd hefur eftirlit með Eignastýringarsviði Landsbankans og yfirumsjón
með mikilvægum þáttum í tengslum við þau viðskipti. Nefndin fer yfir
mánaðarlega skýrslu Eignastýringarsviðs þar sem fjallað er um eignastýringu,
tekjur og stöðu verðbréfasjóða Landsbankans. Mikilvægar breytingar á störfum
Eignastýringarsviðs eru einnig háðar samþykki nefndarinnar.
Rekstrarnefnd samræmir rekstur bankans, stýrir hagræðingu, tækniþróun, þróun
útibúa og eignamálum. Nefndin tekur einnig ákvarðanir um áhættutakmarkanir
og gæðaeftirlit í útibúunum, vaxtabreytingar og verðlag og nýjar vörur og þjónustu
sem útibú Landsbankans bjóða upp á.
Áhættunefnd samstæðunnar var stofnuð til að tryggja að áhætta sé metin fyrir
samstæðuna sem heild. Hlutverk áhættunefndar er að þróa viðeigandi áhættustýringarkerfi
og samræma og hafa eftirlit með vinnu ýmissa áhættustýringardeilda
og -aðgerða innan bankasamstæðunnar. Nefndin á að tryggja að næg tól og
starfslið séu til staðar til að meta, mæla, fylgjast með og stýra vörum, starfsemi,
verkferlum og kerfum samstæðunnar. Frekari upplýsingar um áhættustýringu má
finna í sérstökum kafla um áhættustýringu.
Ytri og innri endurskoðun
Aðalfundur kýs óháðan löggiltan endurskoðanda eða endurskoðunarfélag til að
endurskoða ársreikninga bankans og fara yfir árshlutauppgjör í samræmi við lög
og alþjóðlega endurskoðunarstaðla.