Archivo Foral de Bizkaia. Sección Municipal. Documentación ...

so la dicha pena, so/ la qual mandamos a qualquier escriuano publico que
para esto fuere llamado/ que de ende al que vos la mostrare testimonio signado
con su/ signo porque nos sepamos en como se cunple nuestro
man/dado.
Dada en la muy noble villa de Valladolid, a veynte e tres/ dias del mes de
junio, año del nasçimiento del Nuestro Saluador Ihesu/christo de mill e quatroçientos
e noventa e çinco años.
Va entre renglo/nes o diz en, e o diz en, e o diz el, e o diz e el, e o diz aprueba,
e o/ diz el, e o diz de los, e o diz yncurrieran, e o diz otros, e o diz/ el dicho
conçejo e alcalde e omes buenos. Va sobreraydo o diz o su trasla/do, e o diz
paso, e o diz a (tachado: vida) navegase, e o diz e a, e o diz non/brados, e o diz
la, e o diz fallado, e o diz derrama, e o diz/ auida, e o diz por, e o diz sus, e o
diz hera, e o diz corregidor, e o diz/ fizieran, e o diz repar, e o diz maderas, e o
diz siempre.
Licenciatus./ Licenciatus.
El liçençiado Alfonso Saes Ermosylla, juez mayor/ de las apelaçiones del
Señorio e Condado de Vizcaya e de la/ Tierra e Encartaçiones del, la mando
dar.
Yo, Fernando d’Escobar,/ escriuano mayor del dicho Señorio e Condado, la
fiz escribyr.
Los/ nonbres de las espaldas: Por chançeller, vacalarius. Registrada,
Es/covar. Derechos: escriuano, CCLXX, registro, XVIII, sello, XXXVI maravedis.
En la villa de Hondarroa, a tres dias del mes de março de mill/ e quinientos
e çinco años, antel Pero Vrtis de Ayardia, alcalde/ en la dicha villa, en presençia
de mi, Rodrigo de Goy/tiniz, escriuano de sus altezas, e testigos de juso
escriptos, paresçio presente/ Martin Peres de Careaga, vesino de la villa de
Marquina. E luego, dixo al dicho señor alcalde quel auia nesçesario faser çierto
avto al conçejo// (Fol.136vº) (cruz)/ de la dicha villa ajuntado o al menos a
los regidores, e quel por/ ende pedia e pedio al dicho señor alcalde que su
merçed mandase ajuntar/ el dicho conçejo para quel asi fiziese su avto e por
su justiçia, do/ non, quel protestava e protesto contra el dicho señor alcalde e
sus vienes se/guiendo el tenor de vna carta executoria que de sus altezas en
la dicha/ razon tenia(tachado: s) e dello pedio testimonio.
El dicho señor alcalde di/xo que oya, e mandaba e mando a Pero de Arselus,
fiel de la dicha villa,/ a que junte el conçejo general a voz de canpana para
quel dicho Martin Peres/ diga ende su justiçia e lo que querra e en adelante
estava presto de faser/ lo que de derecho, de su ofiçio, deuia aser, e esto dio
por su respuesta al dicho re/querimiento non consentiendo en protestaçiones
contrarias. E desto pedio/ testimonio.
194