Mentoring Future Leaders

Mentoring Future Leaders
Dominee Deon Doen-Sit-Self
Deon is ses maande gelede bevestig in die amp van leraar by ‘n tradisievaste
NG gemeente in ‘n voorstad van Johannesburg. Sy voorganger was
besig met doktorale studies en het die gemeente op ‘n lassaise faire wyse
bestuur. Alhoewel hy baie geliefd was het die gemeentegetalle begin kwyn.
In die afwesigheid van rigtinggewende leierskap het informele leiers na
vore getree en die leisels van die verskillende kommissies oorgeneem om
sake te probeer red.
Deon het pas ‘n Meestersgraad in kerkreg voltooi en is op ‘n missie om die
gemeente reg te ruk sodat dit binne die amptelik voorgeskrewe strukture
funksioneer. Sy vrou Estelle – ‘n spraakterapeut met haar eie praktyk – het
pas geboorte geskenk aan hulle eersteling, wat boonop ‘n kroep-baba is.
Omdat Deon van nature ‘n perfeksionis is, probeer hy om alles self te doen
en sodoende kritiek vry te spring. Nadat ‘n paar van hulle geroskam is
omdat hulle kommissies nie volgens die letter van die wet funksioneer nie,
het die gemeente- leiers een vir een begin onttrek.
Deon se hoë stresvlak en min slaap maak hom ge-irriteerd en minder hoflik
as normaalweg teenoor almal. Hy voel ook skuldig dat hy vir Estelle so min
ondersteun, veral omdat sy ooglopend nie die hoë standaard haal wat aan
“mevrou dominee” gestel word nie.
‘n Ander bron van bekommernis is sy ouer-wordende ouers wat sukkel om
finansieel kop bo water te hou. Hy het boonop per ongeluk ‘n gesprek
tussen twee gemeentesusters gehoor wat sy preke gekritiseer het en hulle
uitgespreek het teen die feit dat Estelle die gemeente-aktiwiteite
ondergeskik stel aan haar beroep en baba. Hy kon hom nouliks bedwing
om hulle tromp-op te konfronteer.
Vir Deon – ‘n toppresteerder sy lewe lank – is dit ‘n bitter pil om hierdie tipe
kritiek te verduur. Hy begin moedeloos voel en wonder soms of hy regtig
uitgeknip is vir die bediening. Was dit nie vir sy geestelike passie nie, het
hy waarskynlik lankal eerder polisse gaan probeer verkoop. Dit voel vir
hom asof hy in ‘n maalkolk is waar hy besig is om heeltemal beheer te
verloor.
© Learning Link International
April 2005
Module 6 - Case Studies & Role
Plays
Page ! 1