Árbók Háskóla Íslands 1999 - Háskóli Íslands

Rannsóknastofa
í kvennafræðum
Rannsóknastofa í kvennafræðum við Háskóla Íslands er þverfagleg stofnun sem
heyrir undir háskólaráð. Hún var stofnuð samkvæmt reglugerð frá menntamálaráðuneytinu
árið 1990 en tók formlega til starfa haustið 1991.
Samkvæmt reglugerðinni er hlutverk stofunnar að:
• efla og samhæfa rannsóknir í kvennafræðum,
• hafa samstarf við innlenda og erlenda rannsóknaraðila á sviði kvennafræða,
• koma á fót gagnabanka um kvennarannsóknir,
• vinna að og kynna niðurstöður rannsókna í kvennafræðum,
• veita upplýsingar og ráðgjöf um rannsóknir í kvennafræðum,
• leita samstarfs við deildir Háskólans um að auka þátt kvennafræða í kennslu
fræðigreina,
• gangast fyrir námskeiðum og fyrirlestrum um kvennafræði og kvennarannsóknir.
Stjórn
Háskólaráð skipar sex manna stjórn Rannsóknastofu í kvennafræðum til tveggja
ára, þar af fjóra samkvæmt tilnefningum viðkomandi deilda. Stjórn stofunnar nú
hefur starfað síðan í lok september 1998. Í henni sitja: Arnfríður Guðmundsdóttir,
lektor við guðfræðideild, Herdís Sveinsdóttir, dósent við námsbraut í hjúkrunarfræðum
og Rannveig Traustadóttir, dósent í félagsvísindadeild (fulltrúar háskólaráðs),
Sigríður Dúna Kristmundsdóttir, dósent í félagsvísindadeild, Sigríður Þorgeirsdóttir,
lektor í heimspekideild, og Svafa Grönfeldt, lektor í viðskipta- og hagfræðideild.
Samkvæmt ósk stofunnar var skipaður varamaður í þessa stjórn sem
er Helga Kress, prófessor í heimspekideild. Formaður frá september 1998 var
Herdís Sveinsdóttir en haustið 1999 tók Rannveig Traustadóttir við formennskunni.
Ný stjórn verður skipuð haustið 2000.
Rannsóknir
Annadís Gréta Rúdólfsdóttir starfaði við stofuna á árinu sem sérfræðingur í rannsóknastöðu
sem greidd var af Rannsóknarráði Íslands. Rannsóknastofan tók virkan
þátt í samstarfi við erlendar rannsóknastofnanir á sviði kvenna- og kynjafræða
á árinu. Meðal annars má nefna samstarf við Norrænu kvenna- og kynjarannsóknastofnunina
NIKK (Nordisk institutt for kvinne og kjönsforskning) en Rannveig
Traustadóttir var formaður stjórnar NIKK á árinu 1999.
Fyrirlestrar og málþing
Eins og undanfarin ár stóð Rannsóknastofa í kvennafræðum fyrir viðamikilli
kynningu á rannsóknum í kvenna- og kynjafræðum. Þessi kynning fór einkum
fram í formi rabbfunda (Rabb um rannsóknir og kvennafræði) sem haldnir voru
að jafnaði aðra hverja viku á vor- og haustmisseri. Þá voru haldnir opinberir fyrirlestrar
með innlendum og erlendum fyrirlesurum. Eitt málþing var haldið á árinu
í tilefni 50 ára afmælis tímamótarits Simone de Beauvoir, Hitt kynið.
Útgáfa
Á árinu 1999 gaf stofan út ritið Simone de Beauvoir. Heimspekingur, rithöfundur,
femínisti, í ritstjórn Irmu Erlingsdóttur og Sigríðar Þorgeirsdóttur. Bókin var gefin
út í samstarfi við Háskólaútgáfuna. Fréttabréf stofunnar kemur út tvisvar á ári, í
upphafi haust- og vormisseris og í því er dagskrá Rannsóknastofunnar á misserinu,
auk upplýsinga um ráðstefnur, fundi, bækur og annað sem snertir kvennaog
kynjafræði.
102