Árbók Háskóla Íslands 1999 - Háskóli Íslands

Í lagadeild hafa á hverju haustmisseri frá árinu 1995 verið kennd fjögur námskeið
á ensku fyrir erlenda stúdenta. Námskeið þessi eru metin til 15 eininga alls eða
30 ECTS og svara til eins misseris náms. Þau eru: „Comparative Criminal Law" í
umsjón Jónatans Þórmundssonar prófessors, „European Law" í umsjón Stefáns
Más Stefánssonar prófessors, „Legal History" í umsjón Sigurðar Líndal prófessors
og „Law of the Sea" í umsjón Gunnars G. Schram prófessors. Enn fremur hefur
verið boðið upp á sérhönnuð námskeið eða leiðbeiningar á ensku á vormisseri,
þegar þörf krefur. Á árinu 1999 voru samtals 19 erlendir stúdentar í þessu
námi við lagadeild, þrír á vormisseri og 16 á haustmisseri.
Endurmenntunarsamningur hefur verið í gildi milli Lagastofnunar Háskóla Íslands
f.h. lagadeildar annars vegar og félaga starfandi lögfræðinga hins vegar,
þ.e. Lögmannafélags Íslands, Lögfræðingafélags Íslands, Dómarafélags Íslands
og Sýslumannafélags Íslands, um aðgang lögfræðinga að kjörgreinum við lagadeild.
Hafa nokkrir lögfræðingar lokið námi samkvæmt endurmenntunarsamningi
þessum.
Að lokum skal þess getið að á háskólahátíð 3. september 1999 veitti háskólarektor
Páli Hreinssyni dósent viðurkenningu fyrir „lofsvert framlag til kennslu við Háskóla
Íslands“.
Rannsóknir
Lagastofnun Háskóla Íslands sendir árlega frá sér skýrslu um rannsóknir og ritstörf
kennara við lagadeild og er skýrslan birt í Tímariti lögfræðinga.
Erlendir fyrirlesarar og gistiprófessorar
• Geir Ulfstein, prófessor við „Department of Public and International Law“ við
háskólann í Osló og gistiprófessor við „Lauterpacht Research Centre for
International Law“ við háskólann í Cambridge, hélt almennan fyrirlestur 16.
mars 1999 í Lögbergi um efnið: „Þjóðréttarleg staða Svalbarðasvæðisins með
sérstöku tilliti til auðlindanýtingar“.
• Vagn Greve, prófessor í refsirétti og forseti lagadeildar Kaupmannahafnarháskóla,
hélt almennan fyrirlestur 26. mars 1999 í Lögbergi um efnið: „Criminal
Law in the 21st Century“. Fyrirlesturinn var liður í þriggja daga heimsókn
deildarforsetans og eiginkonu hans, Annika Snare, til lagadeildar.
• Annika Snare,afbrotafræðingur, hélt fyrirlestur fyrir nemendur í kjörgreininni
„Ofbeldisbrot frá sjónarhóli kvennaréttar" um efnið: „Women as victims of
private / partner violence“.
• Gérard Légier, prófessor og forstöðumaður alþjóðasamskipta við lagadeild
Háskólans í Aix-en-Provence, kom í heimsókn til lagadeildar í marsmánuði
1999. Hélt hann fyrirlestra og fundi með laganemum um laganám í Aix-en-
Provence og í Frakklandi almennt. Enn fremur hélt hann fyrirlestra í tvo daga
fyrir nemendur í kjörgreininni Evrópuréttur II.
• Ian Freckleton, lögmaður og háskólakennari í Ástralíu, kom í heimsókn til
lagadeildar í júnímánuði 1999. Hann hélt tvo fyrirlestra í Lögbergi, annars
vegar almennan fyrirlestur 21. júní um efnið: „Upplýst samþykki við læknisaðgerðir
og hugsanleg refsi- og skaðabótaábyrgð ef út af er brugðið“, og hins
vegar lokaða málstofu 22. júní með sérfræðingum sem fást við rannsókn og
meðferð tiltekinna brotamála, s.s. kynferðisbrotamála. Efni málstofunnar var:
„Sönnun byggð á sálfræðilegum sjúkdómsmyndum og á ófullnægjandi
niðurstöðum réttarlæknisfræðinnar“.
• Carl Baudenbacher, dómari við EFTA-dómstólinn í Lúxemborg, heimsótti
lagadeild í september og flutti sex fyrirlestra fyrir nemendur í kjörgreininni
„Evrópuréttur I“.
• John Norton Moore, prófessor og forstöðumaður fyrir „Center for Ocean Law
and Policy" við háskólann í Virginíu í Bandaríkjunum, hélt almennan fyrirlestur
á sviði hafréttar 19. nóvember 1999 í hátíðasal Háskóla Íslands. Fyrirlesturinn
var haldinn á vegum lagadeildar, utanríkisráðuneytisins og Hafréttarstofnunar
Íslands og var nefndur: „Nýjar stefnur og straumar í hafrétti“.
Útgáfu- og kynningarstarfsemi á vegum lagadeildar
Námsvísir. Á hverju ári gefur lagadeild út námsvísi, um 40 bls. bækling, sem er
ætlaður nýnemum við lagadeild. Bæklingi þessum er dreift á kynningarfundi fyrir
nýnema, sem haldinn er við upphaf kennslu ár hvert.
Kynningarfundur fyrir nýnema. Fyrsta kennsludag á hverju hausti er haldinn sérstakur
kynningarfundur fyrir nýnema við lagadeild. Öllum skráðum laganemum
er sent bréf þar sem þeir eru boðnir velkomnir til náms við lagadeild ásamt dagskrá
kynningarfundarins.
57