Árbók Háskóla Íslands 1999 - Háskóli Íslands

Íslenskrar málnefndar skuli vera: Conseil de la langue islandaise og Íslenskrar
málstöðvar: Centre de la langue islandaise. Samdar voru álitsgerðir um ýmis atriði
í íslensku máli að beiðni ýmissa aðila.
Lífeðlisfræðistofnun
Lífeðlisfræðistofnun Háskóla Íslands var komið á fót árið 1995 með reglugerð nr.
333/1995 og tók þá við hlutverki Rannsóknastofu í lífeðlisfræði sem starfrækt
hafði verið í þrjá áratugi. Forstöðumaður stofnunarinnar er Jón Ólafur Skarphéðinsson
prófessor. Stjórn stofnunarinnar að öðru leyti skipa fastráðnir kennarar og
sérfræðingar stofnunarinnar auk fulltrúa annarra starfsmanna og fulltrúa nemenda.
Starfsmenn stofnunarinnar 1999 voru, auk forstöðumanns: Guðrún V. Skúladóttir
vísindamaður, Jóhann Axelsson prófessor, Stefán B. Sigurðsson prófessor, Logi
Jónsson dósent, Sighvatur S. Árnason dósent, Þór Eysteinsson dósent, Þórarinn
Sveinsson dósent, Anna Guðmunds fulltrúi, Jóhanna Jóhannesdóttir rannsóknatæknir,
Heiðdís Smáradóttir M.S.-nemi og aðjúnkt og Jóhannes Helgason M.S.-
nemi og aðjúnkt. Aðrir M.S.-nemar, verkefnaráðnir sérfræðingar og/eða stundakennarar
voru: Atli Jósefsson líffræðingur, Ólöf Ámundadóttir sjúkraþjálfari, Anna
Lára Möller sálfræðingur, Ragnhildur Káradóttir lífefnafræðingur, Sesselja
Bjarnadóttir líffræðingur og Wendy Jubb líffræðingur.
Hlutverk stofnunarinnar er tvíþætt, rannsóknastarfsemi og kennsla. Stofnunin
veitir öllum fastráðnum kennurum Háskólans í lífeðlisfræði rannsóknaraðstöðu,
hvar í deild eða námsbraut sem þeir eiga heima, læknadeild, raunvísindadeild
eða námsbrautum í hjúkrunarfræði og sjúkraþjálfun. Einnig getur stjórn stofnunarinnar
veitt vísindamönnum á öðrum fræðasviðum aðstöðu eftir því sem aðstæður
leyfa og efni standa til. Öll rannsóknastarfsemi á stofnuninni er
fjármögnuð með sjálfsaflafé þar sem fjárveiting til rannsókna hefur enn ekki
fengist nema til að greiða fastráðnum starfsmönnum laun. Styrkir hafa einkum
fengist frá rannsókna- og tækjakaupasjóðum Háskólans og Rannís.
Starfsmenn stofnunarinnar vinna að rannsóknarverkefnum á ýmsum sviðum lífeðlisfræðinnar,
s.s. starfsemi sléttra og rákóttra vöðva, stjórn blóðrásar, fituefnabúskap,
sjónlífeðlisfræði, starfsemi þekja, vatns- og saltbúskap, áreynslulífeðlisfræði,
stýringu líkamsþunga, stjórn öndunar, öndunarstarfsemi í lungnasjúklingum,
þolmörkum ýmissa umhverfisþátta hjá laxfiskum o.fl. Einnig er unnið að faraldsfræðilegum
rannsóknum á hjarta- og æðasjúkdómum og skammdegisþunglyndi.
Þá er nokkuð um þjónusturannsóknir.
Starfsmenn stofnunarinnar annast alla kennslu í lífeðlisfræði við Háskólann og
leggur stofnunin til aðstöðu og tækjabúnað til verklegrar kennslu. Að auki hefur
stofnunin tekið að sér að annast kennslu í lífeðlisfræðinámskeiðum þeirra námsleiða
við Háskólann sem ekki hafa fastráðinn kennara í greininni. Þannig hefur
tekist að halda nær allri starfsemi á sviði lífeðlisfræði innan Háskólans á einum
stað sem hefur ótvíræða kosti í för með sér. Veturinn 1998–1999 voru kennd á
vegum stofnunarinnar 15 námskeið og sóttu þau um 530 stúdentar. Jafngildir
þetta um 1900 þreyttum einingum sem að umfangi samsvarar fullu þriggja ára
námi um 20 stúdenta. Heildarvelta stofnunarinnar árið 1999 nam um 32 milljónum
króna.
Hádegisfundir Lífeðlisfræðistofnunar voru haldnir að jafnaði vikulega yfir vetrarmánuðina.
Þar kynntu starfsmenn stofnunarinnar og M.S.-nemar rannsóknir sínar
auk þess sem gestafyrirlesarar héldu þar erindi af margvíslegum toga um líffræðileg
efni.
90