Árbók Háskóla Íslands 1999 - Háskóli Íslands

Tölvumál
Árið 1997 notaði starfsmannasvið eingöngu Macintosh-tölvur. Fyrsta PC-vélin
kom 1998 og stefnt hefur verið að því að allt skrifstofufólk sviðsins fái PC-tölvur í
byrjun ársins 2000. Er þetta í samræmi við stefnu stjórnsýslu háskólans í tölvumálum
og upptöku Lotus Notes skjalavistunarkerfisins á árinu.
Gerð nýs starfsmannakerfis er enn skammt á veg komin en áætlað er að vinna að
því á næsta ári. Fram að þeim tíma verður notast við gamla starfsmannakerfið
sem hannað er fyrir Macintosh.
Starfsþróun og starfsþjálfun
Farið er að gera auknar kröfur um hagræðingu í rekstri hjá opinberum stofnunum
þar sem hugtök eins og gæða- og árangursstjórnun, stefnumótun og áætlanagerð
eru í brennidepli. Starfsfólk við stjórnsýslu og þjónustu innan Háskóla Íslands
vinnur margþætt störf þar sem menntun, þekking og starfsreynsla starfsmanna
er mismunandi. Þessi sérstaða gerir það að verkum að það er mikilvægt
að stuðla að því að starfsmenn fái nauðsynlega fræðslu og starfsþjálfun til að
geta sem best tileinkað sér breytta starfshætti.
Á árinu 1999 hófst átaksverkefni með það að leiðarljósi að endurskoða vinnuferli,
og efla þjónustu og samskipti. Byrjað var á tilraunaverkefni fyrir starfsfólk í Aðalbyggingu
og í því tóku alls þátt um 50 manns. Þeim hluta lýkur í mars 2000.
Einnig hófst undirbúningur að sambærilegu verkefni fyrir starfsfólk deilda og
stofnana sem yrði nátengt fyrra verkefninu. Jafnframt var undirbúið þróunar- og
þjálfunarverkefni fyrir starfsfólk, sem starfar við umsjón, ræstingu, útleigu og
viðhald húsakynna og bygginga H.Í., auk þeirra sem starfa við tækniþjónustu og í
mötuneyti. Í þessum verkefnum er áhersla lögð á samþættingu og gæðastarf.
Stefnt er að því að gæðaliðin í þeim tengist og vinni saman að áframhaldandi
verkefnum eftir að þjálfuninni lýkur. Ráðgjafarfyrirtækið „Skref fyrir skref“ sér um
námskeiðshaldið í samvinnu við starfsmannasvið. Starfsmannafélag ríkisstofnana
styrkir þessi námskeið.
Mötuneyti Aðalbyggingar
Í kjallara Aðalbyggingar er starfrækt mötuneyti fyrir starfsmenn í húsinu. Í byrjun
ársins 1999 var gerð sú breyting á rekstrinum að Skólabær var sameinaður
mötuneytinu þannig að matráðskona mötuneytisins hefur einnig umsjón með
Skólabæ. Ýmsar skipulagsbreytingar til hagræðingar voru gerðar í framhaldi af
því. Má þar einna helst nefna breytta áherslu í matargerð og aukna umsýslu í
tengslum við fundi og móttökur á vegum rektors. Starfsmenn mötuneytisins eru
nú þrír, tveir í fullu starfi og einn í hlutastarfi.
Háskólasamvinna
Samvinna milli Háskólans á Akureyri, Kennaraháskóla Íslands og Háskóla Íslands
er byggð á samkomulagi frá 1997 um að skólarnir leitist við að styðja og
efla samvinnu um starfsmanna- og launamál sín og stuðli að sameiginlegri
fræðslu starfsfólks sem starfar á þessum sviðum. Í febrúar var haldin sameiginleg
námsstefna skólanna að Varmalandi í Borgarfirði. Yfirskrift hennar var: „Aukin
og breytt verkefni fjármála- og starfsmannadeilda háskólanna“, Fulltrúar frá
fjármálaráðuneytinu voru fyrirlesarar og fjölluðu m.a. um breytt vinnuveitandahlutverk
við flutning á verkefnum frá ráðuneytum menntamála og fjármála til háskólanna.
Samráðsnefnd um kjaramál
Samráðsnefnd um kjaramál er skipuð af háskólaráði. Hún tók fyrst til starfa 1990
og hefur það hlutverk að tryggja samstarf og samráð við þau kjarafélög sem
starfsfólk háskólans er aðilar að. Nefndin er skipuð þremur starfsmönnum Háskólans:
háskólaritara, framkvæmdastjóra starfsmannasviðs og Gísla Má Gíslasyni
prófessor sem verið hefur formaður nefndarinnar frá hausti 1998. Tveir aðilar
eru tilnefndir af því kjarafélagi sem til umfjöllunar er hverju sinni.
Með síðustu kjarasamningum fékk samráðsnefndin aukið hlutverk og var henni
falið að vinna að aðlögunarsamkomulagi við kjarafélögin og starfa sem samstarfsnefnd
þeirra eins og kveðið er á um í kjarasamningum.
Á árinu fór fram endurskoðun á aðlögunarsamkomulagi þriggja kjarafélaga af
þeim sex sem gert hafði verið samkomulag við. Þau voru Starfsmannafélag ríkisstofnana,
Félag háskólakennara og Meinatæknafélag Íslands. Samkomulag náðist
við öll félögin um endurskoðunina. Veigamestu breytingarnar urðu gagnvart Félagi
háskólakennara um endurskoðun á röðun vísindamanna og með samkomu-
32